Ferhat Tunç 40 serrî yo ke hunermendî keno, serranê peyênan de mîyanê sîyasetî de zî ca girewt. Demêk verê medyaya sosyale ser o pare kerdbî ke o do teberê welatî de bicuyo. Xora badê ke vejîya teberê welatî, dozgeran derheqê Tunçî de qerarê qedexeyê vejîyayîşê teberê welatî girewtbî.
Tunç hîna nêvejîyabi teberê welatî amadekarîya albumê ‘Marşî û Lawikî’ kerdêne û no album Royem Muzîkî ra teberê welaltî de vejîya. No album de 16 eserî estî û nê eserî ciwanîya Tunçî ra heta nika cayanê cîya-cîyayan de ameyî wendene û qeydkerdene.
Tunçî va ‘marş û lawikî eynî wext de vîrê ma temsîl kenî’ û wina domna: “Nê lawikî 40 serranê mi yê hunermendî zî mîyanê xo de hewênenî. Ez bawer kena ke goşdarwanî zî do wina hîs bikerî. Mi heme eserî wextê xo de bantanê teyîban de qeyd kerdbî û dima ra neqlê computure ameyî kerdene. Mesela lawika Hawa Dere Laçî qala trajedîyê Dêrsimî kena û serra 1978î de ameya qeydkerdene. Lawikî hîsanê wextê xo kirişenî roja ma ya ewroyî. Goreyê mi hewceyî bi naye esta. Çimkî neslo ke tarîxê xo ra dûrî yo, reseno. Goreyê mi tarîxê xo ra qerfîyayîş, felaket o. Ganî ma dejanê xo xo vîra nêkerî û bi marşan reyde zî xoverdêrîya xo nîşan bidî. Tena bi lawikan nêbeno, coka marşê ma zî qîmetin î. Ma nê marşan de ruhê nesle 68î vînenî.”
40 serran de muhacirîya dîyine
Tunçî qiseykerdişê xo de bale ante ser muhacirîya xo ya dîyine ser û wina va: “Ez nê 40 serran mîyan de reya dîyine ya ke vejîyena teberê welatî. Wextê 12ê Êlule de zî ez mecbûr mendbîya ke bivejîya teber. Eke ez nêvejîyayêne teber, beno ke ez amebîya kiştene û tewqîfkerdene. 40 serran ra pey ez reyna mecbûr menda bivejîya teber. Ma verê cû polîtîkayanê AKPyî yê wextê derbeyan reyde dayêne têver, labelê êdî AKP bi xo bîyo donemêko tarî. Verê cû tayê çîyî bi hawayo nimite ameyênê viraştene, labelê nika eşkera yenî viraştene. Ez nêzana do çiqas tîya de bimana, labelê ez do hertim berardişî esas bigîra.”
