Fermandarê Pêroyî yê HSDyî Mazlûm Ebdîyî derheqê detayê operasyono ke vera Bexdadîyî de amebi kerdene de melumatî dayî ajansê Fox Newsî. Goreyê xebere Wezaretê Pawitişî yê Amerîka ra wezîfedarêkê dîyar kerd o ke kiştişê Bexdadîyî serkewtişêk o û no serkewtişê Kurdan o
3 rojî verê Serçeteyê DAIŞî Ebûbekîr El Bexdadî 5 kîlometre dûrê sînorê Tirkîya de bi hemkarîya HSD û îstîxbaratê Amerîka amebi kiştene. Fermandarê Pêroyî yê Hêzê Sûrîyeya Demokratîke (HSD) Mazlum Ebdîyî derheqê operasyonî de melumatê neweyî dayî ê ajansî.
Goreyê xebera ke ajansê Fox Newsî de ameya parekerdene de ameyo vatene ke bi aşman amadekarîya operasyonî ameya kerdene. Goreyê xebere yeno dîyayene ke HSD her merhaleyê operasyonî de ca girewto û hetta endamêkê HSDyî zî wextê sereştişî de ca girewto.
Ebdîyî dîyar kerd ke endamê îstîxbaratî înan ra vato ‘Bexdadî verê hetê rojawanî ra şîyo Idlib û melumatê keyeyo ke Bexdadî do şêro dayo înan. Ebdîyî dewamê qiseykerdişê xo de wina vato: “Ma 15ê Gulane de xeber daye hêzanê Amerîka û ma yewîya nimite ke 3 kesê amerîkayijî zî tede ca gênî awan kerde.”
Çîyêko winasî qet nêameyo eşnawitene
Xebere de ameyo vatene ke endamê îstîxbaratî derheqê tunelê ke Bexdadî tede şono û yeno de, reyna çend kesî ewja de yî û planêko bierzîyo dewre de melumatî dayî. Dima ra roja Şeme hêriş ame kerdene û endamê îstîxbaratî yê HSDyî herême ra ame girewtene. Xebere de cakerdişê endamê îstîxbaratî sey serkewtişî ameyo şinasekerdene û ameyo vatene ke ‘çîyêko winasî qet nêameyo eşnawitene û no serkewtişê Kurdan o’.
Bê Kurdan îmkanê operasyonî çinêbi
Xebere de ca dîyayo vatişê Ebdîyî yê ‘Kişîyayîşê Ebûbekîr El Bexdadîyî bê îstîxbaratê Kurdan mumkun nêbi’ û wina ameyo vatene: “Xebere de ameyo vatene ke Wezaretê Pawitişî yê Amerîka ra wezîfedarêkê rolê HSDyî zaf muhîm erjnayo û dîyar kerdo ke hêzê Kurdan mîyanê teyara de nêbîyî. 11 domanê ke hetê Bexdadî de bîy, teslîmê kesêko biewle ameyî kerdene.”
Rîyê dewleta tirkî ra aşmêk erey kewt
Heto bîn de hesabê Twîtterî yê Fermandaranê HSDyî Polat Canî de zî derheqê operasyonî de tayê melumatî ameyî dayene. Goreyê Fermandar Polat Canî HSD operasyon de bi CIA xebetîyayo. Canî zî dîyar kerdo ke înan endamêkê xo hetê Bexdadî de bica kerdo û goreyê melumatê ê endamî hereket kerdo. Çimeyê ma xo resnayo Bexdadî û testê DNA reyde zî tespît kerdo ke Bexdadî bi xo yo. Aşmêk verê cû qerar ame girewtene ke operasyon bivirazîyo. Labelê seba ke Amerîka xo tepîya ante û Tirkîya zî hêrişê dagîrkerîye dayî destpêkerdene, operasyon aşmêk erey kewt.” ANQARA
