Navenda Nûçeyan
Hêzên Patiya Demokrat a Kurdistanê (PDK), di şeva 13’yê kanûnê li gundê Sêgirkê ya Amediyê ya girêdayî başûrê Kurdistanê êrîşî hêzên HPG’ê kir û di êrîşê de 3 gerîla birîndar bûn. Derbarê êrîşê de Navenda Ragihandin û Çapemeniyê ya HPG’ê jî duh bi daxuyaniyeke nivîskî diyar kiribû ku hêzên PDK’ê tevî ku zanibûn ên nav wesayîtê hevalê wan e bi zanebûn bi awayekî giran gule li wesayîtê reşandine û 2 jê giran 3 gerîla birîndar bûne.
Fermandarê Giştî yê Hêzên Sûriyeya Demokratîk (HSD) Mazlûm Ebdî jî li ser hesabê xwe yê twîtterê de peyamek weşand û diyar kir ku ev êrîş li dijî destkeftiyên kurda ne û êrîş şermezar kir.
Parvekirina Ebdî ya li ser hesaba wî ya twîtterê wiha ye: “Êrîşa hêzên PDK’ê ya li dijî gerîlayên PKK’ê li Amediyê cihê şermezariyê ye û dê destkeftiyên doza kurdî têk bibe. Em banga rawestandina êrîşan û çareserkirina pirsgirêkan bi diyalogê dikin.”
