Parlementerê HDPyî Erdal Aydemîrî tewrê programêk TV bî û weşanê TVyî de zazakî qisey kerdbî. Aydemîr wexto ke zazakî qisey kerdêne weşanê programî ame vindetene û Aydemîr seba protestokerdişê rewşe Heyetê Pêroyî de meclîsî bi zazakî selam kerd. Aydemîr bi deyrê ‘Way Way Ninna’ mesaj şirawit
Vera ziwanê kurdî de bêtehemmulî dewam keno. Parlementerê Çewlîgî yê Partîya Demokratîke ya Şaran (HDP) Erdal Aydemîrî Heyetê Pêroyî yê Meclîsî de zazakî qisey kerd. Bi zazakî qiseykerdişê Aydemîrî meclîs de bî sebebê munaqeşeyan.
Aydemîrî wexto ke dest bi qiseykerdişê xo yê kursî kerd, meclîs bi zazakî silam kerd. Wexto ke Aydemîrî qisey kerdêne kursîyanê AKP û MHPyî ra reaksîyonî ameyî mojnayene. Wekîlê Serekî yê Meclîsî Levent Goko ke Heyetê Pêroyî rayîr berdêne mudaxaleyê Aydemîrî kerd.
Badê ke Aydemîrî silamdayîşê xo qedêna dîyar kerd ke AKP, MHP, CHPyî de zî parlementerê ke zazakî qisey kenî estî û wina va: “Cok ra ganî qiseykerdişê mi yê zazakî hende nêbo sebebê reaksîyonan. Kanalê ATV de cinîyêka bi nameyê Muge Anli esta û seba ke keso/a ke tewrê programî bî û bi ziwanê dayike zazakî qisey kerd, medyaya hetgir weşanê ganî birna. Wexto ke pêvînayîşê Komîsyonê Butçe û Planî yenî kerdene, kesê ke no welat de heqê ziwanê dayîke talep kenî rê veradêne cîyakerdişê çimeyêk, ziwanê înan yeno redkerdene. Qiseykerdişê ke aye wext yenî kerdene zabitnameyan de sey ‘ziwano ke nîno zanayene’ yeno derbazkerdene.”
Aydemîrî qiseykerdişê xo yê peyênan de bi deyrê Way Way Ninna yê Rençber Azîzî ‘Way way ninna, Îna niya aya bîna, Şima vînên senîna’ mesaj şirawit.
Dima ra Wekîlê Serekî yê Grûba MHPyî Levent Bulbulî heqê qiseykerdişî girewt û va: “Ma zaza, turkmen, yoruk û boşnakan seke mabenê înan û dewlete de problemêk bibo, cîya nêvînenî.”
‘Ziwano ke nîno zanayene’
Wekîlê Serekî yê Grûba AKP Mehmet Muşî zî qiseykerdişê xo de ard vîr ke ziwanê no welatî yê fermî tirkî yo û cok ra ganî tîya de vîşêrê tirkî sewbîna ziwanêk nêro qiseykerdene ke kesêk cira fehm bikero. Muşî da zanayeke ke zabirnameyan de sey ‘ziwano ke nîno zanayene’ yeno derbazkerdene, çimkî ziwanê fermî tirkî yo. Muşî tewr peynî va. “Ziwanê hemwelatijo ke tewrê programê Muge Anliye bî ra kesêk fehm nêkeno.”
Nê ziwanê dewlemendî yî
Wekîlê Serekî yê Grûba HDPyî Saruhan Oluçî zî qiseykerdişê xo de va: “Tirkîya de ziwanê cîya-cîyayî estî û nê ziwanê dewlemendî yî. Kesêk nêeşkeno vera kesê ke bi ziwanê xo qisey kenî û heqê perwerdeyîyê ziwanî wazenî de bibo asteng. Eke raştî de meclîs cayo ke kulturê demokratîke vila keno se, qey reaksîyonêko winasî nîşanê silamkerdişêk parlementerî dano. No rê nijadperestî vatiş nîno qebulkerdene. Babeta ziwan babete tewr muhîm ya meclîsî ya. ANQARA
