Navenda Nûçeyan |
Meclisa Medyaya Dijîtal a Kurdistanê bi daxuyaniyekê ragihand ku li hember tecrîda li ser Rêberê Gelê Kurd Abdullah Ocalan dê di 8’ê Cotmehê de kampanyayekê bidin destpêkirin.
Meclisê di daxuyaniye xwe de wiha got:
“Hêzên serdest ên navdewletî bi berdewamî êrîşî lêgerînên çareseriyê yên azadîxwaz û demokratîk dikin. Yek ji van êrîşan jî ya herî bêbext û nemerdane, 9’ê Cotmeha sala 1998’an derxistina Rêberê Gelê Kurd birêz Abdullah Ocalan ji Sûriyeyê, her wiha 15’ê Sibata 1999’an radestkirina birêz Ocalan bo Tirkiyeyê û li Girava Îmralî dîlgirtin e. Ev komplogerî û rûreşiya hêzên navneteweyî ku 23 salên xwe tijî dike, hîn tecrîda giran û îşkence li ser birêz Ocalan didome.
Tifaqa faşîst û dijminê gelan a AKP-MHP’ê armanc dike bi tundkirina tecrîda giran a li dijî birêz Abdullah Ocalan, kurdan qetil bike û hêzên demokratîk jî ji holê rake. Em jî wek Meclisa Medyaya Dîjîtal a Kurdistanê li dijî vê îşkenceya sîstematîk û zalimane dest bi pêvajoya kampanyayek nû dikin.
Em ê meha cotmehê bikin meha berxwedan û têkoşînê
Di serî de wekî ku di şoreşa Rojava de jî tê dîtin, paradîgmaya birêz Ocalan a xwe dispêre demokrasî, ekolojî û azadiya jinan, her wiha hêviya pêşerojeke hevpar em ê bi rêya hemû platformên medyaya dîjîtal bigihînin bi milyonan kesan. Meha cotmehê ku destpêka komplogerî û bêbextiya navdewletî ye, em ê bikin meha berxwedan û têkoşînê.
Em bi biryar in ku bi vê kampanyaya ku dê li her dera cîhanê gel, hêzên demokratîk, zanyar, hunermend, siyasetmedar û nivîskar beşdar bibin, li kolan û di medyaya dîjîtal de em ê ji bo tenduristî, ewlehî û azadiya fîzîkî ya birêz Ocalan têkoşînê bidin. Bi vê armanc û daxwazê kesên li derdora hev dicivin, wê têkoşîna hevgirtina demokrasî û azadiyê bigihînin tevayî cîhanê, her wiha em ê bang li hemû saziyên navneteweyî yên peywendîdar bikin ku xwedî li berpirsyariyên xwe derkevin. Di her kêliyeke vê kampanyayê de em ê dirûşma ‘Ji Ocalan re azadî’ wek alayeke demokrasî û azadiyê bilind bikin.
Kampanya 8’ê cotmehê saet di 20.00’an de dest pê dike
Dem dema azadiya fîzîkî ya birêz Ocalan e. Roj roja li dijî vê bêedaletî û bêhiqûqiya dîrokî xurtkirina hêviyê ye. Kampanyaya me seranserê meha cotmehê dê berdewam bike. Kêliya herî biheybet û bihêzkirina çalakiyê bi rêya HASHTAG’ê dê 8’ê Cotmehê li gorî saeta Amedê saet di 20:00’an û li gorî seata Bruksel di 19.00’an de dest pê bike. Kampanyaya me di rojên 8-9 û 10’ê Cotmehê di salvegera destpêkirina komplogeriya navneteweyî de dê 3 rojan bênavber berdewam bike. Bi vê biryardarî û mebestê, em hemû gelê xwe û dostan vedixwînin bi awayek çalak beşdarî kampanyayê bibin, her wisa li her derê, bi her ziman û rengî û bi yekdengî bêjin ‘Ji Ocalan re azadî’.”
