Meclîsê ÎSÎGî aşkera kerd ke 2018î de tewr kêmî 1923 û îqtîdarê AKPyî de zî nizdîyê 22 hezar û 500 karkerî netîceyê cînayetê karî de cuya xo vindî kerdî
Meclîsê Ewleyîya Kar û Weşîya Karkerî (ÎSÎGî) Raporê Vernî yê Cînayetê Karî yê 2018î bi rayapêroyî rê aşkera kerde. Rapor bi persê ‘Kamî şer de ma hende embazê xo vindî kenî?’ dest pêkeno û rapor de yeno vatiş ke serra 2018î de tewr kêmî 1923 karkerî cuya xo vindî kerdî.
Goreyê raporî serra 2018î de 81 bajarê Tirkîye de 119 cinî, 1804 camêrd û pêropîya 1923 karkerî netîceyê cînayetê karî de cuya xo vindî kerdî. Rapor de bale ancîyena prosesê îqtîdarê AKPyî ser û yeno vatiş ke 23 domanê 14 serrî ra şenik û 67 domanê mabenê 15-17 serrî zî cuya xo vindî kerdî. Rapor de yeno nuştiş ke prosesê AKPyî de nizdîyê 22 hezar û 500 karkerî cînayetê karî de merdî.
Goreyê aşman serra 2018î de cînayetê karî:
Aşma Çele de tewr kêmî 144 karkerî,
Aşma Sibate de tewr kêmî 128 karkerî,
Aşma Adare de tewr kêmî 130 karkerî,
Aşma Nîsane de tewr kêmî 189 karkerî,
Aşma Gulane de tewr kêmî 169 karkerî,
Aşma Hezîrane de tewr kêmî 151 karkerî,
Aşma Temmuze de tewr kêmî 201 karkerî,
Aşma Tebaxe de tewr kêmî 185 karkerî,
Aşma Êlule de tewr kêmî 167 karkerî,
Aşama Teşrîna verêne de tewr kêmî 179 karkerî,
Aşma Teşrîna peyêne de tewr kêmî 155 karkerî,
Aşma Kanûne de zî tewr kêmî 126 karkerî cînayetê akrî de cuya xo vindî kerdî.
