Artêşa Iraqî serê sibayî bi wesayîtanê zirxînan, polîs û hêzanê taybetan kerd ke Kampa Multecîyan a Şehîd Rûstem Cûdîyî (Mexmûr) pê têlan bigêra binê ablûqa. Vera xîretê ablûqa bi seyan roniştoxê Mexmûrî xo ver danê.
Heyetêkê Meclîsê Şarî yê Demokratîkî yê Mexmûrî derheqê ablûqa de selahîyetdaranê artêşa Iraqî de pêvînayîş kerd. Pêvînayîş saetan ra dima qedîya. Dima nameyê Meclîsê Şarî ser o Fîlîze Budak eşkerayîyêke daye.
Fîlîze Budak eşkerayîye de vat: “Artêşa Iraqî pê polîs û leşkeran kerd ke kampe bigêra binê ablûqa. Ê heqê ma yê cuye û îradeyê ma çin hesibnenê. Hukmatê Iraqî qet yew meseleya ma çareser nêkeno, asayîşê ma nêpaweno û dormeyê kampe de kuleyan virazeno. Ma saetêke pêvînayîş kerd û waşt ke kuleyî wa nêrê awankerdene. La ê zî bi israrî vanê ke kuleyan awan bikerê. Ma do îradeyê xo teslîm nêkerê û xoverdayîşî rê dewam bikerê. Îradeyê ma do dewleta tirke yan zî Iraqî rê pêşkêş nêbo. Ma do ser bikewê.”
Eşkerayîye bi sloganê ‘Bijî Berxwedana Mexmûrê’ qedîyaye. Çalakîya xeyme ya şarî dewam kena.
Şarê Mexmûrî ra Hacî Nerexîyî ard ziwan ke ê ablûqa nêwazenê û vat: “Ma bi serran o xo ver danê. Ma do apey gamêke nêerzê. Ê se kenê bikerê, pê tewirê ma xo nêeşkê.”
Dayîke Hedîye Çelî îfade kerd ke Iraq wazeno dormeyê înan têl bikero û vat: “Ma ney qebul nêkenê. Heta peynî ma do xo ver bidê. Ma teslîmîyetî qebul nêkenê.”
Dayîke Qîmet Gabatî vat: “Ma waştişê xo de heqdar ê. Ma heta nika zî dewaya xo ra fek vera nêda. Ma do heta peynî xo ver bidê.”
Dayîke Quderte Pîranî vat: “Ê do nêeşkê bikewê kampe. Nê ma ra çi wazenê? Ma zerar nêda pisîngê înan zî. Bi serran o ma raştê tedaya înan yenê.” MEXMÛR
