Hemsereka MED-DERî Mîne Karakaşe derheqê kursanê ke danî de malumatan daye û dîyar kerde ke vîşêrê kurmancî do kursê soranî û zazakî zî dest pêbikerî. Karakaşe seba tewrbîyayîşê kursan veng daye ke muracatê kursan bikerî û va: “Bi ziwanê xo biwanenê, qisey bikerêne û binusnenê.”
Hemsereka Komeleya Cigêrayîşî ya Kultur û Ziwanî ya Mezopotamyayê (MED-DER) Mîne Karakaşe derheqê kursanê ke komele de danî de qisey kerde û dîyar kerde ke aşma êlule de do ders bi dayîşê dersan zazakî bikerî û wina va: “No hirê aşmî yo ke dersê ma dest pêkerdî. Nika 14 sinifê ma estî. Her sinifêk de 15 wendekarê ma estî. Na hûmare ge-ge resena 20-25 kesî. Sinifê ma yê kurmancî destpêk ra heta mamostayî estbî û dewam kenî.”
Muracatê seba zazakî kêm î
Karakaşe qiseykerdişê xo de daye zanayene ke do kursê înan yê soranî abî û derheqê kursanê zazakî û soranî de wina va: “Ma do roja şeme û yewşeme sinifê zazakî akerdî. Aşamaya hirêne zî nika akerde ya. Ma do aşamaya destpêkî û ya yewine ya soranî akerî. Muracatê seba zazakî kêm î. Ma şarê xo yê zaza û kurmancî ra wazenê ke eleqe nîşanê zarawayê zazakî bidî. Yew serrî de encax sinifêk zazakî abeno û o zî 15 wendekarî yî.”
Ziwanê ma kamî û bîyayîşê ma yo
Karakaşe qiseykerdişê xo yê peyênan de qala asîmîlekerdişê ziwanê kurdî kerde û va: “Ziwanê ma asîmîlekerdişêko zêdereyde rî bi rî yo. Ganî şarê ma no tehluke bivîno. Şarêk bi ziwanê xo esto û yeno şinasnayene. Ziwanê ma kamî û bîyayîşê ma yo. Bi ziwanê xo biwanenê, qisey bikerêne û binusnenê.” AMED
