Federasyonê Komeleyanê Paştdayîşê Huqûqî yê Keyeyanê Tepişteyan û Hukmwerdeyan (MED TUHAD-FED) bi wesîleya rojbîyayîşê Rayberê PKKyî Abdullah Ocalanî eşkerayîyêke daye û nê pare kerdî:
”Birêz Ocalano ke tim ano ziwane ke modernîteya kapalîste dişmenê xoza û merdimî ya keweno serra xo ya 72ine. Ocalano ke 1999î ra nate binê tecrîdê giranî de yeno tepiştene rixmê heme şertena zehmetan vera polîtîkya şerî ya ke Kurdîstan de yena rayraberdene xîret keno ke aştîye bîyaro. La îqtîdaro ke bi polîtîkya şerî Tirkîya îdare keno goşê xo vengê birêz Ocalanî rê girewtî. Bi polîtîkaya tecrîdî yeno waştene ke birêz Ocalan şarî ra bêro cêserfînayene.
Her serre Amara de fîrazkerdişî ameyî qedexekerdene. La rixmê heme zextan şarê ma her ca de fîrazkerdişî kerdî û bi se hezaran kesî tewrê rayraşîyayîşanê Amara bîyî û çimê îqtîdarî tersna. Bi na wesîle Mahsun Dag û Mustafa Karaoglanî yê ke 2009 de rayraşîyayîşê Amara de ameyî qetilkerdene ma înan yad kenê û sozê xurtkerdişê têkoşînî newe kenê.
Ma sey MED TUHAD-FEDî wazenê ke wa cade tecrîd bêro wedaritene û semedê çareserîye wa paştî bidîyo xîretkerdişê Ocalanî.” AMED
