5. Mehkemeya Cezaya Girane ya Amedî semedê Leyla Guvena ke 140 rojî yo grevê vêşanîye de ya, qerar girewt ke a do bi zorî bêra ardene bi mehkeme
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 140. de dewam kena.
Hemsereka KCDyî û parlamentera Colemêrgî Leyla Guvena ke hetê 6. Mehkemeya Cezaya Girane ya Riha ra derheqê ci de dewa ke ameya akerdene de îfade nêda, derheqê ci de qerarê bi zorî ardişî ame dayene.
Dewaya ke Guven a pîya wayê Ocalanî Fatma û birayê ci Mehmet Ocalanî zî yenê muhakemekerdene, avûkatê Guvene Serdar Çelebî tewrê ci bi. Çelebî va: “Muwekîla mi 140 rojî yo grevê vêşanîye de ya, rewşa ci krîtîk a. Eke bi zorî bêra ardene, cuya aye yena rîskeştene. Cok ra îmkanê ameyîşê muwekîla mi çîn ê. No semed ra wa dewa bêra warardene û qerarê ardişê bi zorî mero girewtene.”
Mehkeme qerarê ardişê bi zorî da û dewa peyser eşt. AMED
