Koçak o ke Cenevre de vera tecrîdî kewto grevê vêşanîye vano: Xoverdayîş zî bêvengmendiş zî tercîhê şexsî yê. Mi xoverdayîş tercîh kerd. Çunke çimanê ma ver de bedenê çalakwananê grevê vêşanîye roj bo roje helînê û vera naye de bêvengmendiş nêşîkîna rê mi
Seba ke tecrîdê serê Rayberê Şarê Kurdî Abdullah Ocalanî bêro şikitene, bi serkêşîya Leyla Guvene grevê vêşanîye amebî destpêkerdene û grevî ewro xeylî merkezan de dewam kenê. Rewşa weşîye ya çalakwanan resta asta krîtîke. Welatperwero Kurd Mehmet Alî Koçak zî bi eynî talebî, verê Ofîsê Welatanê Yewbîyayîyan ê Cenewre de 25 rojî yo grevê vêşanîye de yo û çalakîya xo bi qerardarîye dewam keno.
Mehmet Alî Koçak peyê cû daxîlê grevê vêşanîye bi. Tayê rojan verê awanîya Welatanê Yewbîyayîyan de, tayê rojan de zî Merkezê Komelî Kurdî de çalakîya xo domneno. Koçak 52 serre yo û pîyê 6 domanan o.
Koçak kam o?
Koçak Dêrsimij o. Dewa Mazgêrdî Alanyazi de ameyo dinya û 2006’î ra nat Swîsre de sey surgun ciwîyeno. Welatê xo de rastê teda û îşkenceyan ameyo û naye ser welat ra vejîyo û sey surgun ameyo Swîsre. Koçak, her çiqas ke welatê xo ra dûrî bo zî, zerrîya xo welat de menda û seba welatê xo, seba erdê xo qet yew çalakîye ra kêmî nêmendo û bi hiş û zerrîya xo tim seba welatê xo xo ver dayo. Ewro zî seba Rayber Ocalanî yo ke şexsê xo de îradeyê mîlyonan temsîl keno kewto grevê vêşanîye û wazeno ke tecrîdê serê ey wedarîyo.
Bêvengmendiş nêbîyene
Helbet qerarê grevê vêşanîye qet asan nîyo. La Koçakî seba erjanê xo, seba welatê xo qerarêko winasî girewto û no derheq de wina vano: “Mi Leyla Guvene û xoverdayoxê grevê vêşanîye yê bînî çapemenîye ra teqîb kerdêne. Mi bedenê înan ê ke her roje hîna zêde helînê televîzyonan de dîyenê. Seba ke destê mi ra çiyêk nêameyêne zaf şîyêne zorê mi. Ez yew Kurd a û tehamulê mî nêmendo. Seba ke ez zî biba yew parçeyê înan û înan het de bî, mi zî qerar da ci ke ez zî bikewa grevê vêşanîye. Mi qerarê xo keyeyê xo de pare kerd. Keyeyê mi zî hurmet musna îradeyê mi û paştdarîye daye mi. Xora her firsend de yenê zîyaretê mî.
Çalakîya ma vera dişmenî îsyan, seba şarê ma zî vengdayîş a
Koçakî dewamê qiseykerdişê xo de va: “Yew Raybero ke seba estbîyayîşê ma mucadele keno esto. Ma xo bi Rayberî şinasna. Rayber xeta ma ya sûre yo. Rayber tena seba ma Kurdan nê, seba pêroyê şaranê bindestan muhîm o û Rayberê înan o zî. Rayberê yew şarî 20 serre yo, bi taybetî zî 3 serranê peyênan de binê tecrîdê giranî de yo û pêro heqê ci dest ra ameyê girewtene. Her heqê ke her mehkumî rê yenê dayene nêdîyenê ci û bi statuyê taybetî yeno tecrîdkerdene. Çi heyf ke dişmanê ma yo zaf barbar esto û dişmenê ma bi gonîya Kurdan û tecrîdê Rayberê ma payan ser vindeno.”
Wextê temaşekerdişî nîyo…
Koçakî bale ant bêvengîya hemverê grevê vêşanîye ser û va ‘Ganî şaro Kurd êdî bêveng nêmano û xo bîyaro pêser’ û wina domna: “Eke hetê sîyasîyî ra ke ti nêeşkê fikranê xo vajê û her rayîr to rê bêro girewtene, o wext ti xo rê yew rayîro bîn ra gêrenî û bi hawayêkê bînî xo ver danî. Ewro grevê vêşanîye yê ke bi serkêşîya Leyla Guvene ameyê destpêkerdene zî tam na babete de dest pêkerdo û nê grevî vera dişmenî îsyanî îşaret kenê. Reyna girêdayîya Kurdan ê Rayberîye zî îşaret kenê. Ganî şaro Kurd êdî bêveng nêmano û xo bîyaro pêser. Ganî vera sîstemo ke ma rê mergî rewa vîneno de xo ver bido. Ma bedenê xo vêşanîye rê fîstî ra û bi nê qeydeyî xo ver danê. Wextê temaşekerdişî nîyo û ganî kes seba ma xemgîn nêbo û rojê aver rawirzo payan ser. Ma ke pîya tê bigêrê, ma do pîya ser bikewê.”
Ma do bi xoverdayîşî bibê serkewte
Koçakî tewr peynî înan arad ziwan ser: “Heya, yew xoverdayîş esto, la no bes nîyo. Çîyê ke ma şarê xo yê Ewropa ra, xebatkaran ra, welatperweran ra pawenê estê. Ganî nê çalakîyî hîna bibê zêde. Ma pê bawer ê ke tecrîd do bêro şikitene. Ez pêroyê embazan silam kena. Ez pêro embazanê xoverdayoxan bi heskerdiş silam kena. Ez pê bawer a, ma do ser bikewê.” CENEVRE
