Merkezê Xeberan
13 leşker, polîs û ajanê tirkî netîceya hêrişanê Garê de hetê artêşa tirke ra kişîyabî.Eşkera bi ke nê 13 esîran Serekê Meclîsê Tirkîya Mustafa Şentop û Serekê Pêroyî yê CHPyî Kemal Kiliçdarogluyî rê mektubêka hempare nuştbî. Esîrê ke keyeyanê xo rê mektube nuşte mektube de venga Serekkomar Erdoganî zî da.
Nê mektubê ke kopyaya ci çimeyanê HDPyî ra ameye girewtene, 6ê êlula 2019î de amebî nuştene û bin de îmzaya Sedat Sorgûn, Umît Gicir, Sedat Yabalak, Vedat Kaya, Huseyîn Sari, Mevlut Kahvecî, Semîh Ozbey, Suleyman Sûngûr, Muslum Altintaş, Aydin Kose, Adîl Kabakli û M. Salîh Kanca esta.
Mektub bi serrnameyê ‘Serekê Meclîsê Mîletî yê Pîlî yê Tirkîya Prof. Dr. Mustafa Şentopî rê’ nusîyaye û tede ame vîrvistene ke agahîyê înan zanîyenê.
Esîran pare kerd ke selahîyetdarê dewlete zanenê ê binê kamyew şertan de yê û Serekê Meclîsî Şentopî ra waşt ke mektuba înan verê 600 wekîlanê Meclîsî de biwana. Esîran vat: ”Ma texmîn nêkerd ke Komara Tirkîya nêzdîyê 4 serran û 1500 rojî yo wayîrê polîsanê xo nêvejîyena.
Mîyanê hende serran de kes nêeşka garantîya weşîye û asayîşê ma bido hema zî nêeşkeno bido. Êyê ke nêkewenê peyê weşîya ma gelo do bikewê peyê cesedanê ma? Eke Serekkomarîye û Meclîs nêeşkê ma azad bikerê ganî ma muracatê kamca bikerê? 9 roşanî yo ma nêeşkenê keyeyanê xo bivînê. 4 serrî yo ma keyeyê xo ra dûrî yê û înan ra xebera ma çin a. Na rewşe de ma se bikerê? Ganî şima goş bidê wijdanê xo ser.
Eke ma yenê sûcdarkerdene heqê ma esto ke ma pê bizanê. Gelo derheqê ma de bira mehkumîyetî esta? Vateyê ‘sebr bikerê’ têna taloqkerdiş û peygoşîkerdiş o. Pêvînayîşanê bi Abdullah Ocalanî hêvî dabi ma la uca de zî netîceyêke nêkewte destî. Çira nê pêvînayîşan de nêbîyî rojdem? Ma venga şima danê ke bi mesuldarî têbigêrê.
Serekê Pêroyî yê CHPyî rê
Esîran Serekê Pêroyî yê CHPyî Kemal Kiliçdarogluyî rê zî nuşt û wina vat: ”Derheqê ma de serra 2016î de Sereka Komîsyonê Heqanê Merdiman û Wekîle Birêz Şenale Sarihan Xanim eşkerayîye dabi la no qîm nêbi. Ma şima ra wazenê ke mektuba ma û rewşa ma verê kamerayan de rayaumûmîye reyde pare bikerê. Ma venga şima danê ke mesuldarîya xo bîyarê ca.”
Erdoganî rê vengdayîş
Esîran mektube de wina venga Erdoganî da: ”Birêz Serekkomar, wa rehmet û bereketê homayî to ser û welatê ma ser bo. Serekkomarê mi, ma kam ê. Tîya de ma rê vajîyeno ‘dewlete şima nêpersena, wayîra şima nêvejîyena’ aseno ê raşt vanê. 4 serrî derbaz bîyî dore nêameya ma. Wexto ke Hetkarê Mudirê Halk Bankî Hakan Atîlla agêra welat to vatbi ‘O ewladê ma yo, eke ma wayîrê ci nêvejîyê kam vejîyeno.’ Gelo rewşa ma se bena Serekkomarê mi? Ez nêvana wayîrê înan mevejîyê la ma zî estê.”
Esîran keyeyê xo rê zî mektube nuşte û qala rewşa xo, hasrete û pawitişê xo mektube de ardî ziwan. Esîran mektube de lomeyê xo zî kerd.
Esîr Muhammet Salîh Kancayî mektube de wina vato: ”Balkêş o medya ma nêkena rojdem. Eşkera yo peyê ney de îradeyêk esto. Beno ke xeylêk sebebê ney estê. La nê sebebî çendek meşrû yê? Eke selahîyetdarê dewlete rewşa ma ser o eşkerayîyêke bidê ma do bibê hêvîdar. Seba barêka tewr giran a ke ma seke guneyêke ancenê.”
