Êrîşên dewleta tirk ên bi hevkariya PDK’ê li dijî Herêma Behdînanê ya başûrê Kurdistanê didomin. Di çarçoveya van êrîşan de di 18’ê tîrmehê de Çiyayê Kurêjaro yê li Şêladizê hat bombebarankirin û pêşmergê teqawîd Osman Rijî Rêkanî yê ji eşîreta Rêkan hat kuştin.
Kesên tev li merasîma ji bo Rêkan li Goristana Şêladizê hat kirin bûn, xwestin ku êrîşên dewleta tirk demildest bi dawî bibin.
Mela Abid Bêzel Rêkanî ku di merasîmê de li ser navê xelkê Şêladizê axivî, wiha got: “Ev der ji me re kirine dojeh û deriyek me nemaye. Em nikarin ji Şêladizê heta Amêdiyê yan jî Dihokê biçin. Li ser xelkê herêmê bûne agirek mezin. Em daxwaz dikin ku desthilat û hikûmetê tiştekê bike û çareseriyek ji vê rewşa xelqê herêmê re bibîne. Ev şehîdê 60-70’an yê vê herêmê ye ku bi bê mafî kirine qurban. Êdî xelk bê hêz, bêtaqet û bêzar bûye. Ger devera me azad bibe, em tiştek din naxwazin, heta îstîxdamê jî naxwazin. Çiya, kanî, zevî, av û daristanên me dagirkirine. Dijmin çar aliyê me girtine, em ê bi ku ve biçin?”
Hêjayî gotinêye ku dewleta tirk bi hevkariya PDK’ê roj bi roj dagirkeriya xwe ya li ser xaka başûrê Kurdistanê berfireh dike. Tevî dagirkeriya bi aşkere, rayedarên Iraq û başûrê Kurdistanê bêdeng in. Ji ber vê bêdengiyê ji destpêka salê ve di encama êrîşên dewleta tirk a dagirker yên bi hevkariya PDK’ê de, 14 welatiyan jiyana xwe ji dest dane û 11 welatî jî birîndar bûne.
