Teyareyê şerî yê artêşa tirke 28ê kanûna 2011î de tebere sînorî yê dewa Roboskî ke girêdayeyeê qezaya Qilebanî ya Şirnexî ya bombarduman kerd û netîceyê bombarduman dewleta tirke de 19ê ci hema doman pêropîya 34 kesî ameyî qetilkerdiş. Hemsereka Pêroyî ya Partîya Demokratîke ya Şaran (HDP) Pervîn Buldan, wekîl û îdarekarî tewrê merasîmê serrgêra 11. ya Qirkerdişê Roboskî bîyî. Xeylêk temsîlkarê rêxistinanê komelê sivîlî zî tewrê merasîmî bîyî. Merasîm dewa Roboskî de ame kerdene. La verê merasîmî bi seyan leşker û polîsî sewqê Goristanê Roboskî ke 34 kesê ke ameybî qetilkerdiş tede ameyî definkerdiş bîyî. Vîrardişî ra ver Şirnex, Mêrdîn, Amed, Êlih û bajaranê dorme ra şar amey dewe. Keye û merdimê qurbanîyan fotografê qurbanîyan berz kerdî.
Buldane merasîm de qisey kerd û vat: ”Ma reyna keye û merdimanê 34 qurbanan rê serweşîye wazenê. Rixmo ke nê qirkerdişî 11 serrî xo pey de verdayî hema zî derheqê ci de tehqîqatêko xurt nêameyo kerdene. No seba Tirkîya şermêka pîl a û dejêko xorin o. Kamî fermanê nê qirkerdişî dayo eşkera yo. Tek çîyo ke eşkera nîyo edalet û huqûq o. Mi ferasetêkê qirkerî de têrî yê. Feraseto ke lapat eşta Ferhat Encuyî û Roboskî de 34 merdimî qetil kerdo heman o.”
Na birîne birîna ma ya pêroyînan a
Buldane tewr peynî wina vat: “Na dewa do nêqeda. Heta ke kiştoxî hesab bidê, heta ke êyê ke ferman dayo û mesuldarî hesabê nê qirkerdişî bidê ma do têkoşînê xo rê dewam bikerê. Na birîne birîna ma ya pêroyînan a, dejê ma yo pêroyînan o. Heta ke edalet nêro caardene na birîne derman nêbena. Ma reyna vanê ke ma peyê têkoşînê şarê xo de yê.” ŞIRNEX
