Vîrusê Korona ra paketê 3. yê edaletî bi rayanê AKP-MHPyî meclîs de ame tesdîqkerdene. Labelê hepsîyê sîyasî no paketî de ca nêgênî. Coka ra reaksîyonî vejîyayî. Hukmat heta nika tena sey tedbîr heqê pêvînayîşê hepsîyan qedexe kerdo. Xeylê zîndanan de hepsîyê ke bi telefonî merdimanê xo reyde qisey kenî dîyar kenî ke tu çîyê pakîye nêdîyenê înan û werdê înan baş nîyo, binpaykerdişê heqan zî dewam keno.
‘Pêvînayîşê bi telefonan kilm o’
Derheqê babete de Zekiye Orhana ke mêrdeyê aye Abdullah Orhan Zîndanê Tîpa Tyî yê Wanî de tepişte yo qisey kerde û wina va: “Vîrusê Korona ra pêvînayîşê telefonan kerdî 20 deqe la no mird nêkeno. Dayîka Abdullahî nêweş a. Coka ra tewr zêde dayîka xo gêreno. Wexto ke mi gêreno zî seba ke domanî zaf bêrîya pîyê xo kenî ê qisey kenî. Bi no hawa dor nîna mi. Ez hefteyo şî tena 5 deqeyan xeber daya. Ma o wext de tena rewşa yewbînan pers kerdî. Hetê babetanê werd, şîmitiş, pakî û sewbîna de tu amerşîyayîşêk çin o.”
‘Hepsîyê kalî zî estî’
Cinîya Huseyîn Karabulutî ke Zîndanê Tîpa Lyî yê Kalkandere yê Rîze de tepişte yo, Rengîn Karabulute zî qala şertanê zîndanî kerde û wina va: “Mêrdeyê mi de nêweşîya gastrîtî esta. Ma nêzanê ke rewşa ci senî ya. Bado ke vîrus vejîya werdan de zî bedilnayîşan kerdî. Kawişo ke mêrdeyê mi tede yo de hepsîyê kalî zî estî. Mêrdeyê mi vat ke hepsîyanê kalan kerdî sewbîna kawişêk. “
‘Asayîşê canê hepsîyan çin o’
Tewr peynî Meral Abîya ke birayê aye Necdet Abî Zîndanê Tîpa Fyî yê Wanî de tepişte yo qiseykerdişê xo de wina va: “Birayê mi vat ke ‘Tîya de asayîşê canê hepsîyan çin o’. Pêvînayîşê 20 deqeyan mird nêkeno. Birayê mi vat ke rewşa înan her ke şona xirab bena û kawişêk kişta înan kerdî karantîna. Hepsîyî hetê psîkolojîk de zî tesîr benî. Şikê ma estî.” WAN
