Parlamenterên HDP’ê yên dixwazin li dijî tecrîda li ser Ocalan ji Qada Taksîmê heta Qada Galatasarayê bimeşin, ji hêla polîsan ve tên astengkirin
Parlamenterên Partiya Demokratîk a Gelan (HDP) ji bo piştgiriya bi çalakiya greva birçîbûnê ya bêdem û bêdorveger ku hevseroka KCD’ê û parlamentera HDP’ê Leyla Guven ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin û di roja 96’emîn de didomîne, dê ji Qada Taksîmê heta Qada Galatasarayê bimeşin. Beriya meşê bi sedan polîsan Qada Taksîmê dorpêç kir û gelek wesayîtên zirxî li qadê bi cih kirin.
Her wiha gelek kolanên derdikevin Kolana Îstîklalê jî wesayît û polîs hatin bicihkirin. Hevserokên HDP’ê Pervîn Buldan û Sezaî Temellî jî di nav de parlamenterê HDP’ê li ber Otela Hîl a Taskîmê kom bûn. Parlamenteran dest bi meşê kir lê polîsan ew asteng kirin. Nîqaşa di navbera wekîl û polîsan de berdewam dike.
Soylu gef xwaribû
Hêjayî bibîrxistinê ye ku Wezîrê Karên Hundir ê Tirkiyeyê Suleyman Soylu duh li Enqereyê di civînekê de gef li parlamenterên HDP’ê xwaribû û di got; ‘Ger ez destûrê bidim ku hûn bi meşin bila wê demê ji min re bibêjin tu zilam nînî.’ Bi van gotinan jî fermana astengkirina meşê dabû. STENBOL
