Hemserekê Heyetê Rayberdişî yê Meclîsê Şengalî Farîs Herbo yo ke mesajê Ocalanî yê şarê êzidîyan ercna va: “Mesajê Ocalanî semedê êzidîyan mesajêko tarîxî yo.”
Hemserekê Heyetê Rayberdişî yê Meclîsê Şengalî Farîs Herboyî qalê mesajê Rayberê Şarê Kurdî Abdullah Ocalanî yê êzidîyan kerd.
Rayber Apo komelê êzidîyan rê wayîr vejîya
Herboyî mesajê Ocalanî sey mesajêko tarîxî hesibna û va: “Pêvînayîşê Ocalanî zaf muhîm ê. Bi xoverdayîşê şarî tecrîd ame şikitene. Mektuba Birêz Ocalanî şar û sazîyê êzidîyan saf kerdî şa. Îmrali ra ma rê silam şawitî. Semedê ma manaya ci yo cîya esto. Semedê ma êzidîyan tarîxêko newe yeno nuştene. Nê proses de Rayber Apoyî berpirsîyarîye girewte û komelê êzidîyan rê wayîr vejîya. Ma sey êzidîyan merheleyanê girdan ra ravêrtî. Ma raştê qetlîam, ferman, û qirkerdişê îtîqat, ziwan û kulturî ameyî. Mesajê Ocalanî semedê ma zaf erjaye yo. Ocalan azadîya Êzidîxanî esas gêno.”
Herboyî bale ante xoverdayîşê êdizîyan ser û wina dewam kerd: “Îtîqatê êzidîyan de cayê teslîmîyetî çîn o. Êzidîyî heta nika komelêkê birexistine nêbî. Êzidîyî serranê 1990-97 de dimayê ercnayîşê Rayberîye yê ke vatêne ganî êdizîyî rêxistinkerde xo bipawê, bedilyayî. Hêzanê îşxalkaran Şengal de destûr nêdayene êzidîyî hurzê linganê xo ser. Dimayê rijyayîşê rejîmê Saddamî êzidîyî hîşyar bîyî. Teqayîşanê Sêbaş Xîdîr û Tîl Êzîrî ra dima Rayberîye ma hîşyar kerdî. O wext El- Kaîde ke Iraq de bihêz bî waştêne êzidîyan çîn bikero. Hukmatê Başûrê Kurdistanî 2014 de Şengal de serdest bi, rojêk zî firsendê rêxistinbîyayîşê komelê êzidîyan nêda.”
Destana Dewrêşê Evdî do bêro domnayene
Farîs Herboyî vat: “Gama ke DAIŞ kewt Şengal rayberîya 12 suwarîyan de yew qehremanîye ameye ciwîyayene. Şengal her hetî ra ame rexistinkerdene. Dimayê xalisnayîşê Şengalî YBŞ û YJŞ ameyî ronayene. Bi hezaran ciwananê kurdan vera DAIŞî şer kerd û xoverdayîşêko tarîxî pêramot. Nê xoverdayîşî Reqa û heta Dêrazorî dewam kerd. Xoverdayîşê Şengalî çîyêko Rayberîye bi serran o vatêne o bi. Bêşik o ke Şengal ganî xo bi xo îdare bikero. Ocalan raşt vano eke ma sey êzidîyan yew mebê û xover medê fermanê vera ma dewam kenê. Ma ganî sey komelê êzidîyan îradeyê xo û xoserîya Şengalî bikerê xurt û xîyalanê Rayberîye yê Şengalî bîyarê ca. Destana Dewrêşê Evdî ya ke Ocalan qalê ci keno, ewro yena ciwîyayene û ma do bi xoverdayîşî na destane bidê domnayene.” ŞENGAL
