Fermandarê Giştî yê HSD’ê Mezlûm Ebdî bi rêya xizmeta “Zoom” tev li Komxebata Diyalogê ya Navneteweyî bû ku bi dirûşma “Efrîn di navbera dagirkeriya tirk û berjewendiyên navneteweyî de ye” li Kampa Berxwedan a navçeya Fafînê ya kantona Şehbayê tê lidarxistin.
Ebdî di destpêka axaftina xwe de behsa siyasetên dewleta tirk a dagirker ên li Sûriyê û yên li dijî şêniyên Bakur û Rojhilatê Sûriyê kir û wiha got: “Dewleta tirk bi êrişên xwe li dijî Bakur û Rojhilatê Sûriyê ne tenê tunekirina QSD`ê -ku bi komên terorîst bi nav dike- armanc dike, lê belê armanc dike ku herêmên din ên Bakur û Rojhilatê Sûriyê dagir bike, demografiya herêmê biguherîne, dîroka gelên herêmê tune bike û gelê wê qir bike.”
Ebdî her wiha teqez kir ku pêwîst e gelê Sûriyê li hember dagirkeriya tirk helwesteke hişk nîşan bide û wiha domand: “Kiriyarên dewleta tirk li herêmên Bakur û Rojhilatê Sûriyê yên dagirkirî, ne rewa û ne hiqûqî ne. Ev kiryar û binpêkirinên ku dikevin aste destdirêjî, zêdegavî û sûcên şer, divê neyên rewakirin. Divê gelê Sûriyê bi hemû pêkhate û etnîkên xwe li hember van sûcan bêdeng nemînin”.
Ebdî bang li Rûsya û Amerîkayê kir ku helwesteke zelal li hember siyasetên dewleta tirk a dagirker nîşan bidin û anî ziman: “Divê Rûsya û Amerîka bi rola xwe rabin û helwesteke zelal li hember siyasetên dagirkirinê yên dewleta tirk nîşan bidin.”
Ebdî diyar kir ku HSD’ê li hember dagirkeriya tirk disekine û wiha pê de çû: “Em ê her tim li hember van siyasetan bisekinin. Em ê planên dagirkeriyê têk bibin. Dewleta Tirk ji dema destwerdana Sûriyê kiriye û heta niha dixwaze planên xwe bi encam bike. Lê belê berxwedana gelê me li hember dagirkeran, encamên ku li xweşiya dewleta tirk nayên bi xwe re anîn. Em ê di aliyên dîplomatîk, siyasî û leşkerî de kar bikin da ku planên dewleta tirk vala derxin.”
Fermandarê Giştî yê HSD’ê Mezlûm Ebdî berxwedana koçberên Efrînê yên li kantona Şehbayê silav kir û got: “Şêniyên Efrînê ji beriya 4 salan ve li hember planên dagirkeriyê li ber xwe didin. Divê berxwedana xwe dewam û mezin bikin. Dagirkirina Efrînê komployeke navneteweyî bû. Em ê tevî şêniyên herêmên dagikirî, Efrîn û herêmên din rizgar bikin. Sedemên derengmayîna rizgarkirina Efrînê hene, em hewl didin wan derbas bikin. Ji bo rizgarkirina Efrînê xebatên cidî pêwîst dike.”
Mezlûm Ebdî bang li gelê kurd û hemû hêzên siyasî kir ku helwesteke hevpar nîşan bidin û wiha axaftina xwe bi dawî kir: “Divê gelê kurd xwedî helwesteke hevpar be. Divê hemû hêzên siyasî yên kurdî bibin xwedî yek helwest. Divê helwesta hêzên siyasî yên kurdî û gel yek be.”
