Endama Desteya Serokatiyê ya Partiya Yekitiya Demokratîk (PYD) Foza Yûsif têkildarî êrîşên dewleta tirk a dagirker ên li ser herêma bakur û rojhilatê Sûriyeyê û peyama Rêber Abdullah Ocalan axivî.
Foza Yûsif têkildarî êrîşên dewleta tirk ên li ser herêma bakur û rojhilatê Sûriyeyê anî ziman ku ev encama berdewama siyaseta hovane ya li dijî gelê kurd e û wiha got: “Armanckirina bînesaziyên li herêmên bakur û rojhilatê Sûriyeyê û qetilkirina jin, zarok û welatiyan sûcekî şer û mirovî ye.”
Foza Yûsif destnîşan kir ku tu têkiliya çalakiya li Tirkiyeyê bi Rêveberiya Xweser re tune ye ku dewleta tirk ve wek hinceta êrîşan nîşan dide û wiha domand: “Dewleta tirk bi hincetên derew dixwaze êrişên xwe yên hovane rewa bike. Têkiliya bi bûyerên li Tirkiyeyê bi Rêveberiya Xweser a bakur û rojhilatê Sûriyeyê re tune ye. Her çalakiyek li wir çêdibe dewleta tirk êrîşî Bakur û Rojhilatê Sûriyeyê dike. Bi vê dixwaze ji hêzên tundraw re bingehekê ava bike û ji bo têkbirina Rêveberiya Xweser û dagirkirina herêmê wan çalak bike.”
Foza Yûsif bal kişand ser siyaseta dewleta tirk û anî ziman ku dewleta tirk li ser kurdan taktîkan diguherîne lê armanca wê didome û wiha pêde çû: “Hikûmeta Tirkiyeyê di encama dualîtiya ku ji ber siyaseta xwe ya têkçûyî yê de ye, di nava tevliheviyekê de ye. Eger dest ji siyaseta xwe ya înkar û îmhayê bernede, nikare guhertinan pêk bîne. Tirkiye ji bo çareseriya pirsgirêkan, xwe dispêre vebijêrka leşkerî ku ev her têk çûye. Dewleta tirk bi êrîşên xwe yên dawîn piştrast dike ku taktîka xwe diguhere, lê stratejî û armanca xwe li ser kurdan û herêmê neguhertiye.”
“Ger Tirkiye bixwaze pirsgirêkên xwe çareser bike divê mafên gelê kurd û herêmê nasbike.” Bi van gotinan Foza Yûsif wiha îşaret bi rêya çareseriyê kir: “Ev sed sal e li dijî hebûna gelê kurd şer dike, ji bo serkeftinê her tişt bi kar aniye û firotiye, lê divê bizane ku nikare vîna gelê kurd û gelan ji holê rake. Eger Tirkiye bixwaze pirsgirêkên xwe çareser bike, pêwîstî bi naskirina mafên gelê kurd û mafên gelên herêmê heye. Tişta ku kir tenê bû sedema dûrbûn û nefreta gelan, lewre ne mimkûn e ku di van siyasetan de bi ser bikeve.”
Foza Yûsif diyar kir ku dewleta tirk di hundir û derve de têk çûye û got: “Li dijî vê têkçûnê çi dibe bila bibe divê em yekitiya refên xwe xurttir bikin. Bi hevgirtî ax û rûmeta xwe biparêzin. Her êrişek li ser herêmekê êrîşeke li dijî siberoja me ye.”
Di berdewama axaftina xwe de Foza Yûsif bêdengiya Koalîsyona Navneteweyî û Rûsyayê jî nirxand û destnîşan kir ku ev bêdengî ji êrişan re bingehê ava dike. Foza Yûsif got: “Vekirina qada hewayî ji dewleta Tirk bi destûr û qebûlkirina van hêzan pêk tê, bang li wan dikin ku dawî li van polîtîkayên dualîtî û neheq ên li ser me bînin.”
Foza Yûsif der barê daxuyaniyên dewleta tirk ên ji bo Rêber Abdullah Ocalan û pirsgirêka kurd de wiha axivî: “Armanca van gotinan bi çi niyetê be jî li dû xwe qebûlkirina van xalan pêk tîne; hilweşîna stratejiya Tirkiyeyê ya ku xwe dispêre rêya leşkerî, têkçûna siyaseta tecrîdê ya li dijî Rêber Apo ye, Rêber Apo yekemîn muxatebê aştiyê ye û mifteya çareseriyê jî di destê Rêber Apo de ye û pirsgirêka kurd bûye pirsgirêkeke herêmî û navneteweyî, kurd bûne xwedî hêzeke stratejîk û bêyî kurdan tu siyaset bi ser nakeve.”
Foza Yûsif destnîşan kir ku Tirkiye niha li ber du rêyan e; yan dê stratêjiya xwe der barê kurdan de biguherîne, yan jî dê bikevê rewşa gelek dewletên li herêmê û got: “Recep Tayyîp Erdogan ku serokê Projeya Rojhilata Navîn a Mezin bû, dibe ku bibe hedefa wê projeyê. Ger bi aqilane pirsgirêka kurd bi rêyên aştiyane were çareserkirin, wê ev ji bo Tirkiyeyê bibe zayineke nû.”
Piştî 44 mehan di 24’ê cotmehê de agahî ji Rêber Apo hat wergirtin û peyama wî ji aliyê biraziyê wî Omer Ocalan ve hate parvekirin. Têkildarî pêyama Rêber Apo, endama Desteya Serokatiyê ya PYD`ê Foza Yûsif wiha axivî: “Rewşa Rêber Apo ne tenê bandorê li kurdan, li herêmê û cîhanê jî dike. Ji ber vê yekê jî wergirtina agahiyan ji wî ji bo gelê herêmê girîng e. Naveroka peyamê diyar e; tevî hemû polîtîkayên dûrxistin, îzolekirinê dîsa gotina dawîn a wî ye û ev bandoreke mezin li ser gelên herêmê dike. Ji ber vê yekê, îdiayên ku dibêjin êdî bandora wî ne wek berê ye, ne rast in. Rêber Apo muxatabê çareserî û aştiyê ye.”
