Li Herêma Firatê bi tevlêbûna zêdetirî 12 komên dîlanê, li Navenda Çand û Hunerê ya Baqî Xido ya Kobanê, Mîhrîcana Dîlanên Gelerî ya Herêma Firatê dest pê kir. Tê payîn ku dê mîhrîcan heta êvarê bidome
Mîhrîcana Dîlanên Gelêrî ya Herêma Firatê îro bi beşdariya hejmareke ji komên dîlanan û welatiyên Kobanê dest pê kir. Mîhrîcan li Navenda Çand û Hunerê ya Baqî Xido ya Kobanê dest pê kir. Di mîhrîcanê de 12 komên hunerî yên dîlanên gelêrî ku ji gelek bajarên herêma Firatê ne, amade bûn.
Mîhrîcan bi dirûşma ‘Dê em bi hev re çanda xwe ya resen biparêzin’ dest pê kir. Komên dîlanê hunerên xwe di pîrozbahiyên Newrozê de jî pêşkêş kiribûn.
Her wiha hejmarek wênesaz jî tevî wêneyên xwe yên ku cara yekemîn li ser rewşa gelên Sûriyeyê tên pêşandan, beşdarî mîhrîcanê bûne. Endamên Dibistana Çand û Hunerê ya Herêma Firatê pêşandaneke orkestraye li dar xist. Her wiha komên hunerî yên kurd, ereb, tirkmen û çeçen jî ji bo pêşandana hunerên xwe, xwe amade dikin.
Dê mîhrîcan heta êvarê bidome. KOBANÊ
