Hunermend Mikaîl Aslanî Amed de konserêk biraşt û albumê xo yo newe ‘Axpîn’ o ke Kalan Mûzîkî ra vejîyayo da şinasnayene. Aslanî deyrê ke albûm de ca gênê wend û şewe bi deyranê kirmanckî rind bî.
Hunermend Mîkaîl Aslanî daşinasnayîşê albumê xo yê 9. ‘Axpîn’ bi organîzasyonê Ajansê Meya Keyeyê Mamosteyan yê Amedî de bi konserêk da şinasnayîş. Hunermend Cemîl Qoçgirî zî Aslanî tena vera nêda û sehne de ca girewt. Bi seyan hemwelatîyî tewrê konserî bîyî û meymanê deyranê Aslan û Qoçgirî yî.
Aslan bi zarawayanê kirmanckî, kurmancî û tirkî deryan vat. Cemîl Qoçqirî zî deryan vat û reng û vengê cîya yê di hunermendan salon de veng da. Gîtarvano şenik Cem Şivan Ergulo ke xeylê festîvalanê mîyanneteweyî de bi pirodayîşê gîtarî bîyo yewin zî bî meymanê şewe û gîtar piro da.
Aslanî konser de qisey kerd û dîyar kerd ke nameyê albumê ci ‘Axpîn’ yeno manaya ‘Herra bi xêr û ber’ û bale ant qayûman ser û va: “Bi serran o ez seba muzîka kurdî xebetîyena û xizmetê xo do dewam bikera. Her kes bi komelê xo yeno zanayene. Her tim hemra, şar û komel lazim î. Ma umidinî ke do rojê rind, biratî û aştî bêrî na herre ser. Kesê ke bi îradeya şar ameyî weçînayîş, ganî bi îradeya şar şêrî. Tayînkerdişê qayuman çareserî nîyo. Ti cayêk dinya de çîyêko winasî çin o. Pêroyê dinya de zindan yenî kêmîkerdene û çinkerdene. La dinya de tewr zêdeTirkîye de zindan estî. ganî heme zindanî bidî keyeyê kultur û kitabxane. Ganî heme çî ra ver zîhnîyet bibedilîyo.” AMED
