Şervanên HSD’ê yên li eniya Eyn Îsayê gotin ku mîna DAIŞ’ê ya êrîşî warê wan kir û têk çû dê dewleta tirk jî têk biçe.
Şervanên li eniya Eyn Îsayê diyar kirin ku ji sala 2019’an û vir ve êrîşên dewleta tirk ên li ser herêmê nesekinîne û destnîşan kirin ku ew ji her cure êrîşan re amade ne.
Şervanên HSD’ê yên li eniya Eyn Îsayê Mazlûm, Zinar û Alan ji ANF’ê re axivîn.
Mazlûm Girê Spî di axaftina xwe de ev tişt anî ziman: “Êrîşên dewleta tirk ji xwe her tim hebûn, qet nesekinîn. Niha careke din ji bo êrîşeke ji bejahî ve gefê dixwe. Em; şervanên HSD’ê ji her cure êrîşan re amade ne. Ji sala 2014’an heta 2019’an em li dijî DAIŞ’ê têkoşiyan û me ew têk bir. Em ê dewleta tirk jî mîna DAIŞ’ê têk bibin.”
Zinar Girê Spî da zanîn ku dewleta tirk tim gefên êrîşê dixwe û wiha got: “Dewleta tirk her carê dibêje ku wê êrîş bike. Em; şervanên HSD’ê yên li eniya Eyn Îsayê amade ne ku bersivê bidin. Ji dewleta tirk heye ku wê mîna êrîşên dagirkeriyê yên beriya niha be. Em vê sozê didin gelê xwe; çawa ku me çeteyên DAIŞ’ê têk birin, em ê dewleta tirk jî têk bibin.”
Alan Girê Spî êrîşê dewleta tirk bi bîr xist û wih axivî: “Dewleta tirk bi salan e êrîşî xaka me dike. Dibe ku hin cih dagir kiribe. Gefên ji bo dagirkirinê van rojên dawî dubare dike. Li pey dagirkeriyê ye. Du hefte ne êrîş zêde kiriye. Vê sibehê jî obus avêt Eyn Îsayê. Bila her kes bi vê zanibe; vê carê wê gelekî cuda be. Ev xak mîna ku li DAIŞ’ê bû goristan wê li dewleta tirk jî bi heman rengî bibe.”
