Keyeyê Mîraç Çîçekî semedê roşanî şîbî dewa Keleçî ya pabesteyê qezaya Pîranî ya Amedî. Domano şenik Mîraç dewe de verê berê keyeyî de kaykerdêne û dima ra keye ferq kerd ke Mîraç ewja de nîyo. Keye dima ra muracatê qereqolê Pîranî kerd û xebatê semedê vînayîşê Mîraçî yê keyeyê ci 31ê temmuze ra nata bêmaben dewam benê. Pîyê Mîraçî, Remzî Çîçek derheqê babete de qisey kerd û veng da rayapêroyî hetkarî bidê.
‘Selahîyetdarî seke Mîraç vindî nêbîyo têgêrenê’
Remzî Çîçek dîyar kerd ke êdî Mîraçî nêgêrenê û seke Mîraç vindî nêbîyo têgêrenê û va: “Cigêrayîşê semedê vînayîşê Mîraçî de tu aveşîyayîşêk nêbî. Derheqê dosya de qerarê nimitişî esto û 6 kesî ameybî tepiştene. La ma nêzanê ke nê kesî kam ê. Dozgerî heta nika xeberêk nêda ma. 3 aşmî qedîya, dewlet se kena?”
‘Ma rê îxbar ya zî xeberêk nêame’
Remzî dewamê qiseykerdişê xo de wina va: “Seba ke ma xeberêk bigîrê ma muracatê Muge Anli kerd. Ma vejîyayê bername û dewe de se bîyo nêbîyo ma televîzyon de vat. La ewja de zî xeberêk nêvejîya. Ma 22 roje Stenbol de mendî. Seba ke tu xeberêk nêvejîya ê ma tepîya şirawitî.”
‘Ez ameya destbendkerdene’
Remzî, wina qalê xo yê destbendkerdişî kerd: “Hewteyê vîyarte de fermandarê qereqolê Pîranî telefonê mi kerd û veng da mi. Mi zî va belkî zanayîşêk girewtê û ez şîya qereqol. Uca de tu sebeb mi ra nêvatî û mi destbend kerdî. Ez şewêke destbendkerde menda. Dima ra mi berdî dozgerî û îfadeyê mi girewtî. Mi sey gumanbar vînayene.”
‘Îstîxbaratê na dewlete ça de yo?’
Pîyê Mîraçî, Remzî tewr peyîn qiseykerdişê xo de veng da dewlete û va: “Roja ke Mîraç vindî bi nêzdîyê 200 wesayît, seba roşanî ameybî dewe. Wesayîtê ke ameyî dewe, ganî yew bi yew biameyîne qontrolkerdene yan zî wa nika bêrê qontrolkerdene. Îstîxbaratê dewlete ça de yo? Xêrcê Mîraçî 2 domanê mi bîn zî estê. Domanê mi her wext pers kenê, vanê ke do Mîraç key bêro keye. Her kes seke Mîraç nêciwîyabo têgeyreno. Wa dewlete lajê mi bivîno.” AMED
