Roniştişo 7. yê dewaya vera Onur Gencero ke bînaya HDPyî de Denîz Poyraz qetil kerdbî, Mehkemeya Cezaya Girane ya Kampusê Zîndanê Şakranî de yeno kerdene. Roniştişî ra verî bi beşdarîya Hemserekê Pêroyî yê Partîya Demokratîke ya Şaran (HDP) Mîthat Sancarî eşkerayîya çapemenîye dîyaye.
Wekîlê HDP û CHPyî, temsîlkarê rêxistinanê komelê sivîlî, îdarekarê HDPyî, keyeyê Denîz Poyraz, xeylêk serekê baroyan, avûkat û xeylêk hemwelatîyî tewrê eşkerayîye bîyî.
Hemserekê Pêroyî yê HDPyî Mîthat Sancarî eşkerayîye de qisey kerd û îfade kerd ke yeno waştene ke serê na dewa bêro girewtene. Sancarî ard ziwan ke kiştox Gencer bi sereyê xo tênêgêrayo û cînayetêko sîyasî kerdo. Sancarî pare kerd ke tarîxê Tirkîya bi cînayetanê sîyasîyan ê winayênan pirr o û vat: “Mehkeme neçare ya ke nê cînayetî eşkera bikera û weîfeyê xo bîyara ca. Ma do destûr nêdê ke dosya yan zî dewa bi vergumanêkî bêrê qefilnayene. Ganî hêzê peyê nê cînayetî zî bêrê eşkerakerdene. Ganî mehkeme raştîyan veja werte. Eke wina nêkera teqîbê na dewa milê ma de bimano. Ma do seba edalet û raştîye têkoşînê xo rê dewam bikerê. Eke cînayetê Denîz Poyraz nêro roşnîkerdene cînayetê neweyî do biqewimîyê.”
Qiseykerdişê Sancarî ra dima Endamanê ‘Cinîyî Pîya Bihêz ê’ eşkerayîye daye. Dîdare Gul eşkerayîye wende û pare kerd ke heta peynî ê seba caardişê edaletî têkoşîn bikerê. ÎZMÎR
