Di erdlerzê ke merkezê înan Mereş bî ser ora di aşme derbaz bî û hema hemwelatijî bi paştîdayîşê şarî payan ser de yî. selahîyetdarî bi xebatanê sembolîkan îdîa kenê ke mexdurîyetê hemwelatijan raşte ra ameyo wedaritiş. Bajarê ke erdlerzî ra tesîr girewtî vera pêro zehmetîyan cuya xo domnenî. Qezaya Samandagî ya Hatayî de cinîya bi nameyê Gulhanim Yilmaza ke 35 serrî yo seraye de sebze ronena. Gulhanime dejo ke cuyaya bi seraya xo hewl dana ke vîrî bikera.
Gulhanime vat ke sebzeyan aye bi xo çinena û heme şitilê sebzeyî aîdê aye yî. Gulhanime wina dewam kerd: “Ma bezreyê emserrî 15ê Teşrîna Peyêne ra dima eşte erdî. Ma îdareyê xo tîya ra kenî. Krîzê ekonomîye vera û erdlerzî vera qezencê ma çinî yo. Erdlerzî vera ma vayeyan de raştkerdişêk nêviraşt. La her çî vaye yo. Zibil vaye yo. Zibil serra verene 3 hezar bî la emserr 7 hezar o. koyê naylonî 6 TL bî la emserr 7 TL yo. Ma derman bi 500 TL yan herînenî. Her çî vaye yo.”
‘Hewl danî sebzeyan biresnî’
Gulhanime da zanayîş ke merdim erdlerzî vera kare xo vînî kerd û koçê bajaranê bînan kerd û wina vat: “Seba ke ma koç nêkerî, bi zor û zehmetîyan ma hewl danî sebzeyanê xobiresnî. Ma şêrî kam caz î no karê ma yo. Eke çîyêk do bibo beno la çîyêk bêro kerdiş zî çinî yo. Ma ra balcan, firingî, xiyarî ameyê waştiş. La badê erdlerzî baxçe nêmend. Badê erdlerzî mi vat ez karê xo bikera. No kar mi payan ser de tepişeno. Lajêk mi Stenbol de waneno. Banê hirê kênayê mi rijîyayî. Ma nika heme pîya seraye de manenî.”
Di aşme yo seraye de manenî
Gulhanima ke kênaya xo û di torinê xo erdlerzî de vînî kerd qiseykerdişê xo wina qedênaye: “Hema zî hetkarî seba ma nêameya kerdiş. Awanîyê ma yê ke xisar dîyî sey ‘bê xisar’ derbazê qeydan kerdî. Qeydan de seba ke wesayîtê ma esto hetkarî nêdanê ma. Sidika, Zehra û Nîsa dinyaya xo bedilnayî. Heta nika ma tu hetkarîyêka bi fêde nêgirewt. Birinc û run anî. Lazimîya ma bi nê çîyan çinî ya. Ma şewe nêrakewenê heta serê sibayî. Kesêk ma rê serweşîye nêwaşt. Bi aşman o awe çinî ya. ma muracat kenê la vanê ke çinî yo. Ez meqerna nêwazena. No di aşmî yo ke ma seraye de manenî.” HATAY
