Fermandarîya Qerargehê Merkezê Pawitişê Şarî (MPŞ) mîjdanê Newroze eşkera kerd. MPŞyî vat: ”Gerîlayanê Azadîye yê Kurdîstanî îmkanê bêtesîrkerdişê SÎHAyan fîna dest ke dewleta tirke tim pê înan qirkerdişan kena. Hêzanê ma 15 SÎHA dayî war.”
MPŞyî sere de Newroza Rayberê Şarê Kurdî Abdullah Ocalanî û Newroza şarê kurdî û dostan pîroz kerd, şexsê Mazlûm Doganî de şehîdî yad kerdî û reyna sozê serkewtişî newe kerd û nê vatî: ”Seke yeno zanayene dewleta tirke ya îşxalkere ya ke bi serran o vera têkoşînê azadîye yê şarê ma her qeyde hêrişan kena, rewşa jeo-stratejîke ya Tirkîya ser o bazarîye kena û bi paştdayîşê sîyasî leşkerî û teknîkî yo ke hêzanê herême û mîyanneteweyî ra gena kena ke vera têkoşînê ma ser bikewo. Îqtîdaro faşîst ê AKP-MHPyî têgêrayîşê ma dinya ra tecrîd keno, şarê ma dostanê ci ra mehrum verdeno ke netîce bifîno dest. La sey babetanê bînan na babete de zî dewleta tirke ser nêkewna.
Makînayê mergî SÎHAyan bi seyan merdimê qetil kerdî
Na dewlete şerê topyêkunî ke vera têgêrayîşê ma kena de tewr zaf paşta xo droneyanê çekdaran (SÎHA) rê girê da. Îqtîdaro qirker bi nînan hêriş keno ke netîce dest bifîno. Bitaybetî Vakurê Kurdîstan û Rojawan de bi nê makînayanê mergî bi desan hêrişî kerdî û bi seyan merdimê ma qetil kerdî.
Gerîlayan îmkanê bêtesîrkerdişê SÎHAyan fîna dest
Gerîlayanê Azadîye yê Kurdîstanî bi ruhê Newroze têkoşîno xurt mojna ra û planê îşxalî yê Başûrê Kurdîstanî betal kerdî. Pîya bi nê şarê kurdî sîstemê fuze temîn kerd ke eşkeno cewa dewleta tirke bido. Gerîlayanê Azadîye yê Kurdîstanî îmkanê bêtesîrkerdişê SîHAyan fîna dest ke dewlete û artêşa tirke paşta xo bi înan girêdayo, her ca de propagandaya ci kenê û tim Kurdîstan de pê înan qirkerdişan kenê. 13ê sibata 2023yî ra nata hetê hêzanê mara pêro pîya 15ê SÎHA ameyî wardayene.
Lîsteya SÎHAyan ke dîyayî war wina ya:
13ê sibata 2023yî: Garê de BAYRAKTAR TB2
18ê sibata 2023yî: Garê de BAYRAKTAR TB2
8ê hezîrana 2023yî: Qendîl de ANKA
14ê hezîrana 2023yî: Qendîl de BAYRAKTAR TB2
21ê hezîrana 2023yî: Garê de ANKA
22ê hezîrana 2023yî: Qendîl de AKSUNGUR
5ê temmuza 2023yî: Garê de AKINCI
8ê temmuza 2023yî: Garê de BAYRAKTAR TB2
17ê temmuza 2023yî: Qendîl de ANKA
30ê temmuza 2023yî: Qendîl de AKINCI
15ê tebaxa 2023yî: Zap de ANKA
5ê teşrîna peyêne ya 2023yî: Zap de BAYRAKTAR TB2
6ê teşrîna peyêne ya 2023yî: Zap de AKSUNGUR
28ê kanûna 2023yî: Zap de BAYRAKTAR TB2
1ê adara 2024yî: Zap de ANKA
Wardayîşê SÎHAyan do bêro weşanayene
Dîmenê nê çalakîyan ameyî qeydkerdene. Têna rîyê kêmastîya teknîkî ra tay çalakîyan de dîmenî nêameyî girewtene. Ma do nê dîmenan û belgeyanê wardayîşê nînan şarê xo û rayrapêroyîye rê pare bikerê.
No proseso ke ma bi Newroze kewtî de rayîrê azadîye yê şarê kurdî û tîtikê Kampanyaya Rayber Apoyî rê azadîye meseleya kurdan rê çereserîya sîyasîye ramojneno. Na çarçewa de Newroza 2024î zî destpêkerdişê prosesêkê newî yo. HPG do nê prosesî de rolê xo bîyaro ca. Ma her wextî ra zafêr qerardar ê û potansîyelê ma yê şerî her wextî ra zafêr o.
Ma mîjdanê Newrozê şarê xo yê welatperwer û dostanê xo reyde pare kenê, Newroza şarê xo û xoverdayoxanê zîndanan û koyan pîroz kenê û rayraşîyayîşê serkewtişî yê tarîxîyî û hemleya azadîye de her kesî rê serkewtiş wazenê.”
