Parlamentera HDPyî ya Amedî Salîha Aydenîze daye zanayene ke modelê hemserekîye netîceyê mucadeleyê azadîye yê 40 serrî yo û va: “Cinîyî her wareyê cuye de mucadele danê. Mîyanê partîyanê sîyasîyan de û xeylî wareyan de modelê hemserekîye de qerardar ê.”
Parlamentera HDPyî ya Amedî Salîha Aydenîze daye zanayene ke modelê hemserekîye çarçiwaya Mucadeleyê Azadîye yê Şarê Kurdistanî yê 40 serrî û paradîgmaya Rayberê Şarê Kurdî Abdullah Ocalanî de vejîya werte. Aydenîze dîyar kerde ke cinîyî her wareyê cuye de mucadele danê, cinîyî mîyanê cuye de, partîyanê sîyasîyan û xeylî wareyan de modelê hemserekîye de qerardar ê.
Parlamentera Partîya Demokratîke ya Şaran (HDP) ya Amedî Salîha Aydenîze derheqê modelê hemserekîye de û muhîmîya temsîlkarîya cinîyan a wareyê sîyasetî de qisey kerde.
Qezenco tewr pîl o
Aydenîze daye zanayene ke qezencanê tewr pîlan ra yew ê mucadeleyî yê seba cinîyan zî modelê hemserekîye yo û va: “Modelê hemserekîye çarçiwaya Mucadeleyê Azadîye yê Şarê Kurdistanî yê 40 serrî û paradîgmaya Rayberê Şarê Kurdî Abdullah Ocalanî de virazîya. Cinîyî her wareyê cuye de mucadele danê. Cinîyî mîyanê partîyanê sîyasîyan de û xeylî wareyan de modelê hemserekîye de qerardar ê. No model qezencanê pîlan ra yew o. Temsîlkarîya hempare temsîlkarîya demokrasî û azadîye ya. Temsîlkarîya hempare temsîlkarîya ameyoxê ma ya.”
No model hemverê sîstemê dewlete de yo
Aydenîze dewamê qiseykerdişê xo de arde ziwan ke modelê hemserekîye hemverê sîstemê dewlete de yo û wina domnaye: “Modelo ke esto îqtîdarî qeba û îşxalkar pênase keno. Îqtîdar serê sîstemê yewperestîye îdareyê xo awan keno. Modelê hemserekîye hemverê sîstemê dewlete yê camêrdî yê mîyanê cimatî de ewnîyayîşî vurnena. Modelê hemserekîye hemverê nêseypêyîya zayendîye de cîyayîye afernena. No modelê hemserekîye tena seba cinî û camêrdan nêyo. No model heman wextî de seba kultur, dîn, ziwan û neteweyanê cîyayan o.”
Kurdistan de cinîyî her wareyî de cepheyanê vernîyan de yê
Aydenîze qiseykerdişê xo de dîyar kerde ke hişmendîya camêrdî ancax bi hişmendîya cinî eşkena bêro şikitine û wina va: “Mucadeleyê Azadîye yê Şarê Kurdistanî no çî Rojava de zî ramot. Cinîyê Kurdî Rojava de hetêk ra cepheyan de şer kenê hetêna ra seba afernayîşê cuye mucadele danê. Gama ke ma ewnênê tarîxê dinya ra wextê şer yan zî şorişan de cinîyan rolê xo tim kay kerdo. Wareyê sîyasetî de dewlete cinîyî keye de esîr girewtê. La Mucadeleyê Azadîye yê Şarê Kurdî de no cîya yo, Mucadeleyê Kurdan de cinîyî cimat, şer û şorişan de cepheyanê vernîyan de yê û sîyaset de ca gênê.”
Çend ke cinîyî bîyî xurt têgêrayîşê azadîye zî bi xurte
Aydenîze peynîya qiseykerdişê xo de nê vatî: “Cinîyan mucadeleyêko pîl afernayo. Heta ke cinîyî sîyaset de estbê do sîstemê camêrdan o serdest zî bêro rijnayene, sîstemo seypê yê azadîya cinîye bêro awankerdene. Ma muhîmîya temsîlkarîya cinîye partîya xo de dîya. Wextê destpêkî yê têgêrayîşê sîyasîyî yê Kurdan de zî cinîyî yenê dîyene. La no xurtbîyayîş dima ra virazîya. Çend ke cinîyî bîyî xurt têgêrayîşê azadîye zî bi xurte.” AMED
