Erdlerzê ke Mereş de qewmîyayî û tesîrê 10 bajaran kerd, hewteyêk peynîya xo de verda. Hûmara qurbananê erdlerzî nêzdîya 30 hezaran bîye, û karê xelisnayîşî hema zî dewam kenê. Parlamentera Partîya Demokratîke ya Şaran (HDP) ya Wanî Muazzez Orhana ka roja verên a erdlerzî ra Dîlok de ya, ANFyî rê qala rewşa Îslahîye kerde.
Orhane da zanayene ke 24 saetan de xo resnayî Dîlok û vat, ‘‘Wexto ke ma serê sibayî resayê tîya, 2 tîmê xelisnayîşî xirban ser o bîyî. Se ra 60-70ê Îslahîyeyî rijîya. Yê bînan de zî xesarê pîlî est ê. xeylî kesî merdî, xeylî birîndarî est ê û xeylî kesî zî hema binê xirban de yê. 3 rojan ra ver ma şîyî nêweşxane û ma qet kadroyê nêweşxaneyî nêdîyî. Uca de vajîya ke ‘Ma tena karê cenazeyî kenê’. A roje 830 kesî ameybî qeydkerdene. Helbet na hûmare dima hîna vêşî bîyî.
Serdestîya AKPyî 2 rojê verênan de nêresa tîya û nika zî xebate dana vindartene, tena xirbanê ke veng tira yeno, uca de xebitênê. Hema zaf xirban de hêvî est a la seba ke karê xo wextê xo de nêkerd xeylê cayan ra hêvî birnaye.’’
Îslahîye de awe û elektîrîk çin o
Orhane ard ziwan ke hema zî Îslahîye de awe û elektîrîk çin o û vat, ‘‘Embazê ma hewl danê ke xo biresnê her cayan. Dewan ra zî zaf zirar est o û kesêkî xo nêresnaybî înan. Ma zî hema tespîtê fermî yê tîyayî nêkerdo. Seba ke şar zafane merkezê Îslahîye der o, ameyo ke cenazeyanê xo bigîro û bero dewe de wedaro. Tîya de awe çin a ke pê cenazeyî bêrê şitene, elektîrîk çin o. Bi lezgînî gere çareser bibê û çadir tûwaletî zî bêrê ronayene.’’
Orhane vat: ‘‘Ez şîya Nurdag, Hassa û Kirikhanê Hatayî. Her ca de hem xebatê AFADî qîm nêkerdêne hem zî AFADî destûr nêdayêne ke kesê bînî bixebîtê. Şarî bi îmkananê xo Îslahîye, Nurdag û Kirikhan de binê xirban ra merdimî xelisnayêne. Gama ke selahîyetdarî resayî ci, xebatê înan vindarnayî û kontrol girewt destê xo. Gama ke ma şîyî Hassa, bînaya ke birayê wekîlê AKPyî binê de yo, ûca cigêrayîş ameyêne kerdene. Bîna ke binê ci de 90 kesî estbî de xebat nêameyêne kerdene. Destûr nêdayêne ke kes bixebîto. Seba ke verê xebata kesanê bînan ame girewtene, xeylî kesî merdî. Her ca de şar hêrsbîyaye yo. Vano ma eşkayêne zaf kesan bixelisnê la înan nêverda.’’
