Hemserekê Şûbeyê Amedî yê Hûmara 2. yê Egîtîm Senî Recep Şîmşekî dîyar kerd ke her çiqas ke serra 2012î ra nata dersê kurdî sey dersê weçînitoxî bibo zî mekteban de dersdayîşê kurdî ameyo wedarnayene
Wezîrîya Netewî ya Perwerdeyî (MEB) serra 2012î de dersê zaravayê kurmancî û zazakî (kirmanckî, dimilkî) yê kurdî mufredatê perwerdeyî de zêde kerde û kurdî sey dersê ‘weçînitox’ kewt programê perwerdeyî. Her çiqas ke dersê kurdî yê ‘weçînitox’ mufredatê MEBî de bibo zî mekteban de dersê kurdî nîno dayene.
Keyeyê wendekaran dîyar kerdî ke mudirê mekteban vanê ke seba ke sinif çin î wendekar kurdî nêweçînenî û tay mudirî zî vanê seba ke mamostayê kurdî çin î wendekarê ke dersê kurdî weçînenî nêeşkenî dersê kurdî bivînî. Mamostayê kurdî nînê tayînkerdene û cok ra zî dersê kurdî nînê dayene. MEB emserr zî tayînkerdişê mamosteyanê kurdî pê nêard.
Derheqê babete de Hemserekê Şûbeyê Amedî yê Hûmara 2. yê Egîtîm Senî Recep Şîmşekî qisey kerd û dîyar kerd ke her çiqas ke serra 2012î ra nata dersê kurdî sey dersê weçînitoxî bibo zî mekteban de dersdayîşê kurdî ameyo wedarnayene. Şîmşekî va: “Ganî seba sinifanê 5,6,7 û 8î êlula 2012î ra dersê kurdî biameyêne dayene. Sozê ke dîyayî mamosteyanê kurdî nêameyî caardene. Kadro nêdanî mamosteyanê kurdî. Dersê kurdî mekteban de bîyo problemêko gird. Emserr zî tayînkerdişê mamosteyanê kurdî nêvirazîya. Sewbîna biranşanra mamosteyî kewenî dersî kurdî. Dersê kurdî yeno qelskerdene.” AMED
