Paştdayîşê Wendekaran yê Munzurî vera hêrişanê nîjadeperestanê ke nê rojan vera wendekaranê kurdan bîy zêde, nêrazîbîyayîşê xo mojna. Polîsan hêrişê çalakîya wendekeran kerd û nêverda ke wendekarî pankartan abikê.
Paştdayîşê Wendekaran yê Munzurî derheqê hêrişanê vera wendekaranê kurdan de beyanatê çapemenîye da. Polîsan çalakîye de hêrişê wendekaran kerd ke bi nuşteyê “Ma hêrişanê vera wendekaranê kurdan şermezar kenê” pankartêk akerdibi. Her çiqas polîsan hêrişê wendekaran kerdibi zî wendekaranê Unîversîteys Munzurî beyanetê xo pare kerd.
Beyanatê Paştdayîşê Wendekaran yê Munzurî wina yo: “Nê hêrişî her çiqas sey hêrişê yew-di tenanê nîjadperestan bêrê hesibanayene zî ganî wina bêrê zanayene ke hetê îqtîdarî ra bi hewayêkê sîstematîkî yenê kerdene. Ma nê hêrişan şinasnenê ke Antalya de vera wendekaranê Kurdan amebi kerdene. Sakarya de babîyêk û lajê ci seba ke Kurdkî qisey kerdêne ameyî qetilkerdene, ma uca ra şinasnenê. Ma Şerzan Kurtan ra, Medenî Yildiriman ra, Ugur Kaymazan ra şinasnenê. Ma sey şaranê nê erdî bi des hezaran serran ra nata tîya de yê, bi des hezaran serran ra pey zî ma do tîya de bibê. Ma her cayê nê erdî de yê. Ma heta ke îradeyê wendekaranê ke wazenê pîya biciwîyê bîyarê ca û unîversîteyanê demokratîkan saz bikê her tim do her ca de bibê. DÊRSIM
