Komeleya Rojnamegeran a Dîcle-Firatî (DFG) seba nuştoxê kurdî Musa Anterî (Apê Musa) yo ke 20ê êlula 1992yî de taxa Seyrantepeyî ya Amedî de amebi qetilkerdene, serê gorê ci de yad kerd.
Verî cayê qetilkerdişî kuçeyê 442yî yê taxa Cumhurîyetî de merasîmê yadkerdişî ame kerdene. Endamê DFGyî, Platformê Rojnamegeran ê Cinîyan ê Mezopotamya (MKGP), Partîya Demokratîke ya Şaran (HDP), Partîya Herêmê Demokratîkî (DBP), lajê Anterî Dîcle Anter, Wekîlê HDPyî Îmam Taşçier û Gulîstane Kiliç Koçyîgît, merdimê tepişteyanê nêweşan TUHAY-DER, Xîretê 78an ê Amedî, rojnameger Huseyîn Akyol û xeylêk kesî tewrê yadkerdişî bîyî.
Dîcle Muftuoglu merasîm de qisey kerd û îfade kerd ke guleyo ke Anter qetil kerd, erzîya ziwan û cigêrayîşê raştîye yê kurdan. Dîcle ard ziwan ke pê qetilkerdişê Anterî ame armanckerdene ke şarê kurdî bêro bêvengkerdene.
Dîcle vat: “Ma sey teqîbkerdoxanê Apê Musayî qelema ey girewte xo destî û raştîyan nusenê. 16 teqîbkerdoxê Apê Musayî zî 16ê hezîrane de tepişîyayî. Polîsan kamera û xebatê înan sey delîlê sûcî mojnayî. Ê kesê ke raştîye resnenê şarî rûmetê ma yê. Ma qelema Apê Musayî yê, generalê ci yê qijî yê. Ma do qetî têkoşînê raştîye ra fek vera nêdê.”
Îmam Taşçierî zî da zanayene ke heta ke Apê Musayî seba ke raştîyî vatêne ame qetilkerdene û no sîstem dewam bikero merdimê sey Apê Musayî do est bê.
Girseyî bi sloganê ‘Çapemenîya azade nêna bêvengkerdene’ cayê qetilkerdişê ey de qerenfîlî ronayî. AMED
