Hemserekê Partîya Yewîya Demokratîke (PYD) Salih Muslimî derheqê hêrişê Taksîm-Stenbolî de ANFyî rê qisey kerd.
Salih Muslimî bale ante ser ke no hêriş hetê Hêzanê Şerê Taybetî yê dewleta tirke ra ameyo serûberkerdene û vat: “Ma nê hêrişê terorîstî şermezar kenê. Na entrîkaya Osmanîyan a û çewî rê fayde nêkena. Hêzanê Rojawanî, HSD, Îdareyê Xoserî û PYDyî roja verêne ra nata pê xeylêk eşkerayîyan no hêriş şermezar kerd. Hêrişê vera Rojawanî hê dewam kenê û beno ke bizêdîyê. Ganî pêro hêzê ma xo îşxalêkê neweyî rê amade bikerê, tedbîranê xo bigêrê.”
Muslimî da zanayene ke dewleta tirke seba ke planê ci yê vera Rojawanî pûç bîyê muracatê komployêkê winayênî kerdo û bi taybetî Kobanê kerda hedef. Muslimî vat: “Seba qesasî qestî ra ê Kobanê kenê hedef. Çunke DAIŞ Kobanê de bin kewt. Dewleta tirke seba qesasê DAIŞî no senaryo amade kerdo û eke firsend bivîna cade hêriş kena. Dewleta tirke bi hêrişê Taksîmî waşt ke kurdan bikera hedef. A hêrişkera ke tepişîyaya hesabê ci yê medyaya dîjîtale û fotografanê ci ra aseno ke yew eleqeyê ci pê OSOyî est o. Fotografê ci yê ke binê alaya Sultan Muradî de gêrîyayê, est ê. A bi xo kurde nîya, yew têkilîya ci ya bi kurdan û Îdareyê Rojawanî zî çin a.”
Muslimî pê hesna ke no hêrişo provakatîf kurdan keno hedef û vat: “Ganî her kes bi taybetî hêzê demokratîkî vera nê provakasyonî hişyar bibê. Ez vana qey rayaumûmîya Tirkîya zî zanena ke çi ho qewimîyeno. Ganî ma verê nê kayan de baldar bibê û tedbîranê xo bigêrê.” HESEKÊ
