Endamê Konseya Hemserekîye ya PYDyî Salih Muslîmî derheqê îdîayanê serê medyaya komelkî ê derheqê weşîya Rayberê Şarê Kurdî Abdullah Ocalanî de ANFyî rê qisey kerd.
Salih Muslîmî vat: ”Rewşa Rayberîya seba pêro Kurdîstanî babetêka girîng a. Coka ganî serê ci de bêro vindertene. Seba ke raştîye eşkera biba ganî şar vejîyo meydanan. Îmrali de hetê dewleta tirke ra rejîmêko taybet yeno caardene. NATO zî hende Tirkîya Îmraliyî ra mesuldar o. Êyê ke Rayberîye remnayî mesuldarê ci yê. Na meseleyêka mîyanneteweyî ya.”
Muslîmî grevê vêşanîye vist vîrî û da zanayene ke heqê kurdan o ke rewşa Abdullah Ocalanî ra agahdar bibê.
Muslîmî vat: ”Çalakî û têgêrayîşê kurdan ê seba pêvînayîşê Îmraliyî heqdar ê. Eke no nêzdîbîyayîşê dewlete dewam bikero kaos beno pîlêr. Çi KCK çi KCDK-E ganî pêro rêxistinî çalakîyan bikerê. PYD zî Kobanê û Qamişlo de şarî reyde tewrê çalakîyan beno. Eke Îmraliyî ra xeberêke nêra girewtene kurdî do nêeşkê vinderê û no seba kesî hol nîyo. Bawerîya merdimî bi AKPyî nîna. Ganî pêvînayîşê rî bi rî bêro viraştene. Heta ke Îmraliyî ra xeberêke bêra kurdî wa payan ser o bê.” QAMIŞLO
