Hemserekê Partîya Yewîya Demokratîke (PYD) Salîh Muslîmî derheqê rewşa peyêne ya herême de ANFyî rê qisey kerd.
Muslîmî vat: ”Waştişê dewleta tirke qedînayîşê kurdan o. Şertî senî benê wa bibê, hêrişê dewleta tirke dewam kenê. Erdlerz zî sey dîyarîyêke vînenê. Wextê erdlerz de zî hêrişê vera Rojawanî kerd. Bitaybetî Şehba ke binê tesîrê erdlerzî de mend, bêmabên cirê hêrişê topan ameyî kerdene. Pê droneyanê çekdaran hêriş kerd. Til Rifet de erdlerz bişîdet ame hîskerdene. Şar bananê xo ra vejîya û hêrişî zî nêvîndetî. Gerek şarê kurdî nê qewimîyayîşan hol bivîno û fam bikero. Kenê ke şarê ma herra ci ra vejê.”
Salîh Muslîmî vat: ”Serfermandarê Amerîka Mark Milley ame herême ke tîya leşkerê ci estê, heqê ey yê zîyaretî est o. Rewşêka îstîsna nîya. No zîyaret zaf ame qiseykerdene. Rojdemê dewleta tirke de cayê xo girewt û sey hetkarîya HSDyî ame îdîakerdene. Na herra dewleta tirke nîya û heqê ci yê mudaxale çîn o. Derheqê zîyaretî de zanayîşo zelal destê ma de zî çîn o û hayîya ma pê çîn a ey HSDyî reyde pêvînayîş kerdo ya nê. HSD eşkerayîyêke nêdaye. Verî zî zîyaretê winayên bîyî.
Seba ke zaf kesî DAIŞî weye kenê, hema bi temamî nêqedîyayo. Tay çeke danê ci, tay lojîstîk û tay zî pere danê ci. Xora herra ke ameya îşxlakerdene de zî zîhnetê DAIŞî est o. Heta ewro hêzêko vera DAIŞî bêmabên têkoşîn keno HSD yo. Eke ewro tîya tehlukeyê DAIŞî est o, no semedê dewletanê bînan zî tehluke yo. DAIŞ hem wazeno kurdan qir bikero û hem zî dişmenê şaranê bînan o. Amerîka nê têkoşînî semedê xo dana. Gerek têkoşîno hempar bêro domnayene. Xora selahîyetdarê Amerîka zî wina vanê. Hêzo ke peyê DAIŞî de yo eşkera yo. Gama ke dewlete tirke tehdîtê hêrişî kerdî, hêrişê çeteyan zêdîyayî. Gerek vera dewleta tirke tedbîr bêro girewtene ke paştî dana DAIŞî. Hêzê mîyanneteweyî gerek pîya bi têkoşînê vera DAIŞî vera dewleta tirke û hêzê bînê ke paştî danê DAIŞî zî têkoşînê hemparî bikerê. Heta ke verê hêzanê ke paştî danê DAIŞî têkoşîno hempar mero kerdene, DAIŞ do tim bibo.”
Muslîmî vat: ”PDK çirey dewleta tirke sey dişmenî nêvîneno la dewleta tirke tim kurdan sey dişmenî vînena. Weqfê Hetkarî yê Barzanî hetkatî resna Efrînî û çeteyan destna hetkarî ser. Ma nê kedişê PDKyî raşt nêvînenî. Dewleta tirke û çeteyê ci zîyaret kerd ke tim kurdan kişenê, remenê û îşkence kenê. No zîyaret yeno meşrukerdişê îşxalê çeteyan. Şarê kurdî meşrûkerdişê çeteyan qetî qebul nêkeno. Ma nêzanê dewleta tirke ra senî yew menfeatê ci est o la çi beno wa bibo gerek no zîyaret nêameyêne kerdene. Şarê Efrînî Şewba de xeyman de ciwîyeno û paweno ke wa Efrîn bibo azad. Qey ti şaro ke mecbûr mendo, Efrînî ra vejîyayo, zîyaret nêkenî? Qey ti birînanê nê şarî nêpêşênî? Qey ti herra ke hetê çeteyan ra ameye îşxlakerdene zîyaret kenê û nê îşxalî kenê meşrû?” HESEKÊ
