Hêrîşê dewleta tirke yê vera Başûr û Rojawanê Kurdistanî ke bi ortaxîya PDKyî 17 nîsane de daye destpêkerdiş dewam kenê. Derheqê babete de Endamê Konseya Serekîya Partîya Yewîya Demokratîke (PYD) Salih Muslîmî qisey kerd û hêrişê dewleta tirke yê vera Başûr û Rojawanê Kurdistanî ercna.
Muslîmî îfade kerd ke dewleta tirke hêrişê Zap û Başûrî kena û nê hêrişî 2014 ra nata çarçewa Planê Çokdayîşî de yenê kerdene. Muslîmî vat: ”Dewleta tirke pê nê hêrişan armanc kena ke verê Têgêrayîşê Azadîye bigêra, Rojawan û Başûrî îşxal bikera, gerîlayan qir bikera.Dima ke ê pê rayîrê DAÎŞî nêeşkayî planê xo bikerê, Efrîn, Serêkanîyê û Girê Sipî îşxal kerdî. Nê hêrişê îşxalî yê vera Rojawanî ewro zî dewam kenê. Dewlete Vakur de DAIŞî ra xirabêr yew qirkerdişî kena. Şarê Rojawanî, Vakurî vera ney xo ver dano. Şar PKKyî de bîyo yew, paştî dano gerîlayan. Gerîlayê Zapî têna gerîlayê Vakurî nê gerîlayê pêro Kurdistanî yê.”
Muslîmî bale ante ser ke Başûr de tay hêzî paştî danê dewleta tirke ya îşxalkere û vat: “Tirkîya nêwazena kurdî bibê wayîrê statuyî. Tirkîya çira Başûr de 40 baregehê mendeyî viraştî? Çunke wazena Başûrî îşxal bikera. Tirkîya heta nika statuyê Başûrî zî qebul nêkerd. Îdareyê Başûr û PDKyî zî ney hol zanenê. Dewleta tirke her roje hêrişê Rojawanî kena. Hêzê garantorî Amerîka û Rûsya verê nê hêrişanê Tirkîya nêgênê. Têna gerîlayî cewabê hêrişanê Tirkîya danê. Gerîlayî û Îdareyo Xoser neçare yê ke xo bipawê. No heqê ma yo meşrû yo. Hêzê mîyanneteweyî çekan, droneyan danê Tirkîya. Ma vera ney xora tedbîrî gênê. Pê nê droneyan merdimê ma şehîd benê. Ma vera nê droneyan çareserîyêke do bivînê.”
Muslîmî vist vîrî ke rejîmê Erdoganî wazeno mîlyonêk sûrîyeyîjan bierşawa herêmanê îşxalkerdeyan û vat: “Bab, Cerablûs, Efrîn, Serêkaniyê û Girê Spî de bi hezaran kurdî neçare mendî ke hêrişan de koç bikerê. Dewleta tirke bi nê hawayî demografî vurnena. Tirkîya nika herêmanê Rojawanî de kampanê pîlan virazena û nînan de cergan ca kena. Erdoganî multecîyê sûrîyeyîjî sey hacetî şuxilnayî, Ewropa ra pere girewt. Nika zî wazeno nê multecîyan herêmanê îşxalkerdeyan de ca bikero û demografî bivurno. Dewleta tirke çend hêrişê ma zî bikera ma do her ca de xo bipawê û plananê dewleta tirke çin bikerê. Xoverdayîşê ma do ser bikewo.” Çime: ANF
