Şaredarîya Rêya Armûşî ya Wanî projeyê xo yê ewilî kerd cuye. Şaredarîya Armûşî ke weçînayîşê herêmî yê 31ê Adare de hetê Partîya Têduştî û Demokrasîyî yê Şaran (DEM Partî) ra ame bidestkerdiş, projeyê xo yê ewilî yê seba cinîyan ca ard. Bi projeyê bostanê bajarî yê yewin xebata xo ca ardî. Taxa Hatunîye de bi nameyê ‘Bostanê Bajarî yê Denîz Poyaz’ awan kerd û şitlê xo yê ewilî rojê vîyarte de ramitî.
Endama Meclîsê Şaredarîya Rêya Armûşî Yildiz Tuncere derheqê projeyî de ajansê JINNEWSî rê qisey kerd.
Yildize dîyar kerd ke Wan bi serran o hetê qeyûmî ra yeno îdarekerdiş û projeyê cinîyan ameyê xespkerdiş. Yildize ard ziwan ke qeyûm seba cinîyan tu xebate nêkerdo û wina vat: “Xebatê ma yê cidî est ê. Projeyê bostanê bajarî pêro Tirkîya de estbî la Wan de çinbî. Seba nê ma zî sey berpirsyarî dî. Heta destê ma ra ame ma projeyê bostanê bajarî seba cinî û dayîkê xo kerd cuye.”
‘Seba dayîkanê ma dîyarî ya’
Yildize vat, bostanê bajarî yê şaredarî seba dayîkan dîyarî ya û wina vat: “Bostanê bajarî bi amancê ke dayîkî berardişê xo bi xo biresnê ame awankerdiş. Dayîkî do tîya ra hewcedarîyê xo, hewcedarîyê mutbexê xo peyda bikerê û bi sebzeyê ke resnenê amadekarîyê zimistanî bikerê. No proje hetê ekonomî de do paştdayîş bido dayîkan. Proje nê hetî ra zaf muhîm o. Pêwa bostanê bajarî ma do xebatanê xo yê seba cinîyan dewam bikerê. No seba ma esas o. Wa no projeyê ma bibo wesîleyê projeyê hîn başêr.”
‘Ma waşt ma çîyêk bikerê’
Yildize dewamê ercnayîşê xo de wina vat: “Seba mewsîmî ma bi projeyê bostanî dest pêkerd. Semedo ke demê ci bî ma wina dest pêkerd. Ma waşt ma çîyêk bikerê. Projeyê ma yê hîra est ê. Dayîkê ma seba mewsîmê hamnanî nê waştî. No bostanê yewin ê bajarî yo.”
‘Denîz Poyraz şexsêk bi erj a’
Yildize wina qedêna: “Ma nameyê bostan kerd Denîz Poyraz. No name seba cinîyanê ciwanan xeylêk bi erj o. Seba ma şexsêk muhîm a. Ma qerarê nameyê Denîz Poyraze da. No qerarêk rast o. Ez seba pêro embazanê xo yê cinî ke keda înan na xebate de derbaz bîya sipas kena.”
