Endama Merkezê Cigêrayîşî yê Jineolojî û akademîsyene-rojnamegere Nagîhan Akarsele verê keyeyê xo yê taxa Bextîyarî ya Silêmanîye de hetê MÎTê dewleta tirke ra 4ê teşrîna verêne de Başûrê Kurdistanî de amebî qetilkerdene. Badê çend saetan kerdox serê zextê cinîyan û welatîyan de ameybî tepiştiş. Badê ameyîşê endamê keyeyê Nagîhan Akarsel û heyete HDPyî 8ê teşrîna verêne de cenaza Silêmanîye ra ver bi Hewlêrî ameye erşawitiş. Nizdîyê 5 rojan cenaza Hewlerî de ameye vindarnayîş û bi bahaneyanê cîyayan erşawitişê cenaza ameye astengkerdiş. Her çend ke bilet bêro girewtiş zî fîrmayê hewayî Pegasus û Turk Hava Yollari cenaza red kerdî û cenaza berê sînorî yê Îbrahîm Xelîlî ra derbazê hetê bakurê Kurdistanî kerdî. Cenazaya Akarsele merkezê Cîhanbeylîyî de û dekewtiş dewa Golyazîyî (Xelîkan) de hetê bi seyan kesan ra bi tilîlîyan û silogananê ‘Cinî, Cuye, Azadî’, ‘Şehîd nêmirenî’ û ‘Bijî Serek Apo’ ameye pêşwazîkerdene.
Wextê definkerdişê cenazaye de leşkeran hewl da nêverdî fotografê Akarsele bêro berzkerdiş la cinîyan xover da û bi fotografê Akarsele rayîr şîyî. Rayîrşîyayîşê cinîyan de dovîzê ‘Cinî, Cuye, Azadî’ ame akerdiş û girseyo ke kom bî ber bi goristanî ra şî. Merasîmê definkerdişî de Verfeka Meclîsê Cinîyan ya Partîya Demokratîke ya Şaran (HDP) Ayşe Acar Başarane qisey kerd û vat: “Nagîhane, ma pêro yî. Beno ke Nagîhane qetil bikerî. La sey hemrayê aye ma do mîrasê aye dewr bigêrî û heta peynî ma do têkoşîn bidomnî.”
Vera abluqa û astengîyanê leşkeran wecîbeyê dînî ameyî kerdiş û cenazaya Akarsele bi siloganê ‘Cinî, Cuye, Azadî’ ameye definkerdiş. Cinîyan qerenfîl û şalê morî ronayî serê mezelê Akarsele û dima ra zî derbazê keyeyê aye bîyî.
Keyeyê Akarsele do serweşîyan keyeyê xo de qebul bikero. KONYA
