HDP do mîtîngê Amedî yê fînalî siba Raşteyê Îstasyonî de pê bîyara. Namzedê Hemşaredarîye yê HDPyî vengê tewrbîyayîşê mîtîngî kerdî
Partîya Demokratîke ya Şaran (HDP) çarçeweya xebatanê weçînayîşê herêmî de yena peynîya xebatanê xo. HDP mîtîngê fînalî yê Amedî do siba saet 11.00î de Raşteyê Îstasyonî de pê bîyaro. Hemserekê Pêroyî yê HDPyî Sezaî Temellî, Hemserekê KCDyî Berdan Ozturk, Hemserekê Pêroyî yê DBPyî Mehmet Arslan û temsîlkarê partîyanê kurdan yê ke HDPyî reyde îtîfaq kerdî do qisey bikerî. sewbîna do Koma Gulên Xerzan û hunermend Ayşenur Kolîvare konser bidî.
Mizrakli: Ma vanê ‘Ma tîya de yî’
Namzedê HDPyî yê Hemşaredarîya Bajarê Girdî yê Amedî Selçûk Mizrakliyî dîyar kerd ke ê ameyî peynîya maratonê weçînayîşî û wina va: “Ma Newroze de reng, ruh, coş û sibaroja Amedî dî. Ma pêro pîya yî. Zerrîya ma heminan yew a. Bawerî û qerarê ma heminan yew û raşte de yo. 29ê Adare de ma pêro do raşteyan de vajî ‘Ma tîya de yî.’ Amed do reyna mîtîngê 29ê Adare de bej û bala xo nîşan bido. Ma do xo seba govenda 1ê Nîsane amade bikî. Ma heme şarê xo dawetê raşteya mîtîngî kenî.”
Ma do bi ruhê Newroze tewrê mîtîngî bibî
Namzedê HDPyî yê Hemşaredarîya Yenîşehîrî Îbrahîm Çîçek û Belgîn Dîken, Namzeda HDPyî ya Hemşaredarîya Rezan Zubeyde Zumrut, Namzedê HDPyî yê Sûrî Fîlîz Buluttekîn û Cemal Ozdemîr û Namzeda HDPyî ya Peyasî Kezîban Yilmaze vengê tewrbîyayîşê mitîngî kerdî û dayî zanayene ke ê paweyê bi sehezaran merdimanî ke bi ruhê Newroze tewrê mitîngî bibî. AMED
