Unîversîteya Munzurî de 13 beşî ameyî akerdene. Labelê xeylê beşê ke wendekarê înan çin î de kadroyê akademîk asîyenî. Kadroyê akademîn ke tewrê dersêk daxî nêbeno, meaşê xo herînenî. Se ra 80ê kadroyî hemşerîyê rektorî yî û Xarpêtî ra yî
Serra 2018î de gama ke Unîversîteya Munzurî ya Dêrsimî ameye akerdene, hûmara wendekaran dormeyê 7 hezarî bî. Serra 2019î de hûmara wendekaran qasê 2-3 hezarî kêm bîye. Her çiqas ke Rektorê Unîversîte Ubeyd Îpekî vajo ke hûmara wendekaran 6 hezarî ya, roja ke unîversîte ameya awankerdene ra heta ewro xeylê beşî ameyî padayene. Zafaneyê nê beşan zî ‘tabelaya înan esta, labelê wendekarê înan çin î.’
Serra 2018î de kesêk qeydê xo Beşê Biyo Muhendisî, Muhendisîya Jeolojîye, Muhendisîya Kîmyaye, Muhendisîya Dorme, Muhendisîya Metalurjîye û Muhendisîya Zexîreyan nêviraşte. Coka ra nê beşî ameyî padayene. Badê ke nê beşî ameyî padayene nizdîyê 40 wendoxê nê beşan Mektebê Berzî yê Meslekî de ameyî cakerdene. Sewbîna hûmara wendekaranê Fakulteya Muhendisî se ra 65 kêmî bîye.
Serra 2018î de Fakulteya Ekonomî zî tede beşê ekonometrî, karsazî, malîye, zanistîya sîyasî û têkilîyê mîyanneteweyî ameyî padayene. Nîno zanayene ke wendekarê nê beşan kamî ca de ameyî cakerdene. Labelê ame zanayene ke musnoxê nê beşan hema zî bi hawayo serûber meaşê xo herînenî.
Serra 2012î de Fakulteya Resnayîşî ame akerdene, labelê wendekarê no beşî zî çin î. Labelê no beş de dekanêk, sekreterê fakulte Yunus Baraşiro ke şoforê rektorî bî û tayînê no beşî ame kerdene, 5 wezîfedarê cigêrayîşî û musnoxêk estî. Nê kesî bê dersêk meaşanê xo herînenî.
Sewbîna Fakulteya Berê Awe de zî wendekarî çin î. Labelê sey heme beşan musnoxê no beşî zî meaşanê xo herînenî.
Ame dîyarkerdene ke se ra 80ê musnox, xebatkarê akademîk û îdarî yê unîversîte Xarpêtî ra yî. Çi tesadufo ke Rektor Ubeyd Îpekî zî Xarpêtî ra yo. Rektor Îpekî serra 2018î de warzaya xo Elîf Sezere Fakulteya Muhendisî û waya xo Seda Gundezalpe zî Mektebê Berzî yê Meslekî yê Pêrtagî de ca kerdbî.
Derheqê babete de tay xebatkarê unîversîte qisey kerdî. Xebatkarî seba ke karê xo ra nêrî eştene nameyanê xo eşkera nêkerdî. Xebatkarî dîyar kerdî ke musnoxî teberê meslekê xo de xebetîyenî û zafê înan bê ke dekewî dersêk meaşanê xo herînenî. Xebatkarî dayî zanayene ke çi tesadufo ke kam Unîversîteya Firatî ya Xarpêtî qedîneno qismetê înan yeno Unîversîteya Munzurî û rektor Ubeyd Îpekî hem kadroyê xo yê keye û hemşerîyanê xo zaf paweno. DÊRSÎM
