Gerîlayê HPGyî Egîd Îpeko 23ê gulana 2017î de Dêrsim şehîd kewt rixmê heme muracatanê keyeyê ci cenaza nêameye dayene. Cenazaya Îpekî vizêr badê hîrê serran pê kargo keyeyê ci rê şawîyaye. Keyeyî cenazaya xo taxa Tîzyanî ya qezaya Artuklu ya Mêrdinî de binê abluqa de defin kerde.
Parekerdişê sîyasetmedaranê inîyan wina yî;
Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene wina va: “Dayîka Xalîse rê vanî ‘Kargoya to esta, bigêr.’ Parçeyêk canê aye, cenazeya lajê aye ke bi kedêko zêde ci pîl kerdbî kerdî paket û dayî dayîke. Labelê reyna zî dayîke vana ‘Sereyê şarê ma weş bo.’ Ea tarîx şahidê ma bo. Kesê ke no dejî bi to danî antene wa dejê hîna girdan biancî.”
Hemsereka Pêroyî ya Kongreya Demokratîke ya Şaran (HDK) Salîha Aydenîze wina va: “Zihnîyeto ke dişmenîya vera şarê kurdî de sînoran nêşinasnenao, heme ercanê merdimîye binpay keno. Labelê ma do timî şarê xo reyde bibî.”
Mesajê Parlamentera HDPyi ya Mêrsîni Fatma Kurtalane zî wina yo: “Îqtîdaro ke cenazeya domanêk bi kargo erşaweno dayîke rê wa bi hezaran reyan şêro binê erdî ra. Wa bi hezaran reyan lanetê dişmenîya vera kurd û merdimîye bo.”
Parlamentera HDPyî ya Êlihî Feleknas Uca: “Şima reyna nîşanê herkesî da ke çiqas bêexlaq û bêwijdan î.”
Parlamentera HDPyî ya Sêrtî Meral Daniş Beştaş: “No gam vejîya teberê merdimîye. Tu cayêk dinya de û serê rîyê erdî de kerdişêko wina nêameyo kerdene û vînayene. Cenazeya domanêk bi kargo erşawenî dayîke rê. Gelo kamî dîn, wijdan û huqûqî de no esto?”
Parlamentera HDPyî ya Mûşê Gulîstan Kiliç Koçyîgît: “Cenazeya domanêk bi kargo erşawenî dayîke rê. Ziwanê merdimîye de çîyêko winasî çin o. Gelo kamî wijdan û kamî exlaqî no qebul keno. Merdimîye tu wext wina rezîl nêbîya.”
Parlamentera HDPyî ya Amedî Dêrsim Dag: “Bedenê lajê dayîkek bi posta raykenî. No rezîlî yo. Polîtîkaya şima ya dişmenîya kurdan do peynîya şima bîyara.”
Parlamentera HDPyî ya Amedî Semra Guzel: “Şima qasê misqalê zere nesibê xo merdimîye ra nêgirewta. Xo ra şerm bikerêne. Labelê rîyê şima yo ke şima şerm bikerî bibîyayêne şima do wina bêexlaqî nêkerdêne.”
Parlamentera HDPyî ya Amedî Remziye Tosun: “Ez tu çekuyêk nêvînena ke vaja. Vera no kerdişî de faşîzmê Hîtlerî zî şenik maneno.”
Parlamentera HDPyî ya Riha Ayşe Surucu: “Îqtîdarê AKPyî dayîkek rê cenazeya lajê aye bi kargo erşawenî. Şima merdimîye ra vejîyayî.”
