Parlamenterê Iraqê Soran Umer yê girêdayî Fraksiyona Komeleya Dadgerî ya li Parlamentoya Iraqê, li ser malpera xwe ya facebook’ê derbarê dahata nefta herêmê ya tê firotin de nivîsek parvekir. Soran Umer di nivîsa xwe de dibêje; “Hinardeya nefta Herêma Kurdistan ya di sala 2022’yan de 158 milyon û 310 hezar û 151 bermêl bû. Bi giştî dahata wê jî 12 milyar û 422 milyon û 260 hezar û 894 dolar bû.”
Soran got ku ji vê dahata giştî tenê 5 milyar û 709 milyon û 704 hezar û 87 dolar ji bo dahata giştî maye û radestî Wezareta Darayî hatiye kirin. Soran ragihand ku 6 milyar û 712 milyon û 556 hezar û 807 dolar bi navê xercê çûye.
Parlamenter Soran di dewamê de jî got; “Di sala 2022’yan de nirxê bermêlek neftê bi 100 dolar û 743 sent bû, Kompanyaya Somo di sala 2022’yan de nefta Iraqê bi 95 dolar û 536 sent firotiye. Lê Herêma Kurdistanê her bermêlek bi 87 dolar û 915 sentan firotiye. Yanî ev jî tê wê wateyê, 12 dolar û 828 sent ji ya heyî kêm hatiye firotin.”
Di dawiyê de jî hate gotin; “Her bermêlek 36 dolar û 66 sent maye, 15 dolar û 849 sent ji xercê çûye. Yanî nefta herêmê tê talankirin.”
