Komxebata Mîyanneteweyîye ya Awe ya Rojawanî qedîyaye ke rayberîya Heyetê Îdareyê Herêmî û Jîngehê Cizîre de, bi hemkarîya Unîversîteya Rojava û Merkezê Cigêrayîşan ê Firatî amebî kerdene. Netîcenameyê komxebate ame eşkerakerdene.
Tewr tay 300 kesî tewrê komxebate bîyî û tede 5 babetê serekeyî ameyî nîqaşkerdene; peyman û krîterê mîyanneteweyî yê serê çem û çimeyanê awe, tesîrê sîyasî, ekonomîk û ekolojîkî yê kêmîyayîşê awe.
Netîcenameyê kommxebate bi kilmî wina yo:
-Tirkîyaya ke vera şarê Rojawanî awe sey çeke xebitnena wa bêra şermezarkerdene.
-Binpaykerdişê qanûnanê awe yê Tirkîya wa sey rapor bêrê dayene heyet û rêxistinanê Neteweyan ê Yewbîyayeyan (NY), Yewîya Ewropa.
-Tirkîya rê warê mîyanneteweyî de teda bêra kerdene ke heqê awe binpay nêkera.
-Tirkîyaya ke Peymana Cenevre binpay kerda wa gerreyê ci mehkeme rê bêra kerdene.
-Wa meseleya awe ya bi Tirkîya bêra belgekerdene.
-Wa Îdareyo Xoser meseleya awe pê dîyalog û hemkarîya terefanê sey Iraq û Sûrîye çareser bikero. Wa Îdareyo Xoser babeta krîzê awe de polîtîkayanê xo eşkera bikero.
-Wa rêxistinê heqanê merdimîye û rêxistinê hetkarîya merdimîye derheqê krîzê awe de paştî bidê herême.
-Wa Îdareyo Xoser merkezanê cigêrayîşan bi taybetî serê asayîşê awe awan bikero.
-Wa îstasyon û kanalîzasyonî newe ra bêrê awankerdene, metodê enerjîya alternatîfe bêrê şuxilnayene, Çemê Dîcle ra fayde bêro girewtene û awa ci bêra dayene herêmanê bînan.
-Awa herême wa bêra pawitene û teqîbkerdene.
-Çimeyanê herême ser o cigêrayîş û xebatî wa bêrê kerdene, semedê ney zî wa komîteyêke bêra awankerdene.
-Îdareyo Xoser wa semedê karûbaranê awe komîteyêka dîplomasî ya taybete wa awan bikera. HESEKÊ
