Li ser efsaneya Newrozê şîroveyên cuda cuda hene.
Her çendîn cudahî li ser agahdariyên bûyera Newrozê hebin jî, belê wateya hêja ya naveroka vê roja dîrokî na guhere.
Naverok û cewherê vê efsaneyê; berxwedan e, wêrekî ye, hêvî ye, bawerî ye û di êncama van xislet û taybetmendiyên mirovahî de, serkeftinek mezin a bi rûmet e.
Ji ber van taybetmendiyên ewqas hêja yên dîrokî, di ser vê bûyerê re 2.500 – 2.600 sal derbas bûye lê ji cewherê xwe tiştek wenda nekiriye.
Di van hezar salan de, bi hezaran êrîşên talanê, wêranê û qirkirinê hatin ser Kurdistanê, erê nikaribûn çand û hinera gelê Kurdistanê bi temamî asimile bikin, nasnameya wî ji holê rakin, lê gelek derbeyên giran li resenî û pîroziyên gelê me dan, weke mînak dewleta dagirker a tirk got “me, ev gel ji dîrokê rakir, xist bin Çiyayê Gilîlê, ser wî bi çimento seyand û nema dikare rebe ser xwe”!
Le na xêr, bi hêza felsefeya Rêbar APO, Kawayên Hemdemî Mazlûman, Mahsûman, Sakîneyan, Zeyneban û şopdarên wan, li dijî zalimên hemdemî serî hildan û mirazê wan xwînxwaran di qirika wan de hişt.
Bi saya van rêberên Tevgêra Azadiya Gelê Kurdistanê, ew xaka Çiyayê Agiriyê hat qelişandin, ew ruhê serîhildêr û xwedî cewherê mirovahiya dîrokî ji bin wê erda “çimentokirî” hat derxistin û li goreyî wan ew rûmeta “kuştî ya mirî” bû zindî!
Wisa diyar e, êdî ew xeyala dagirkeran û xwînxwaran nema dikare bibe rastî, nema dikarin rûmet û serkeftiyên gelê me bişkînin û bixin bin erdê.
Jiber ku vê carê, pêşengên Tevgêra Azadiya Gelê Kurdistanê, bi zanebûn rahiştin barê vê dozê û ketin qada Şoreşa Kurdistanê.
Sedema ku bi hezar salan karibû xwe li himber bi hezaran êrîşan ragire; dewlemendiya çand û hunera Kurdistanê bû, sedema ku serketinek serbixwe ya mayinde jî bi dest nexist; lawaziya zanist û politik bû.
Lê vê carê di ronahiya felsefe û kesayetiya Rêber APO de pêşengên Tevgêra Azadiya Kurdistanê, têkoşeriyek bi exlaq û polîtîk afirandine.
Jixwe Rêber APO, avakirina Tevgêra Azadiya Kurdistanê, di roja NEWROZA 1973an de, weke gava yekê bi civîna li Bendava Çubuka Enqereyê despêkir!
Nîşaneya gava dudan a canbexşane ya herî şênber û berbiçav, bi têkoşîna zîndanan a Mazluman ra di roja NEWROZA 1992 de hat avêtên û li derve jî bi pêngava 15ê Tebaxê re, qonax bi qonax ev ruhê serhildêr û serketî bi pêşve ket û heta roja îro her bi mezinbûn birêve diçe.
Kesayeta serîhildêr a Kawayê Dîrokî yê Hesinkar, bi kesayeta exlaqî û politik a Rêber APO û Kawayê Hemdemî Mazlum Dogan re, piştî hezar salan gihiştin hev û di NEWROZên 52 salan de pijiyan û stewiyan, nuha jî di NEWROZA 2024an a 53an de, tê tacîdar kirin.
Wisa xuya dibe ku di NEWROZA îsal (2024) de, gelê Kurdistanê, li her deverê; her çar parçe û derveyî welat, bi dostên xwe ve, wê ji her salê pirtir bi îrade û bi coş pîroz bike.
Her wiha, wisa diyar dibe ku wê qîma xwe bi hêza heyî neyne û wê ji her salê bêhtir bi zanistî û bi rêxistinî tevbigere û bi vê şêwaza nûjen NEWROZÊ pîroz bike. Û jixwe wateya kesayetiya polîtîk û exlaqî jî ev e.
Mezinbûna vî ruh û îradeya naşikê ya şoreşa gelê Kurdistanê, dagirkerên Kurdistanê û palpiştên wan ên cîhanî jî dibînin û ditirsin.
Loma, axayê faşist R.Erdogan erkdar kirine û guman heye ku di vê NEWROZÊ de êrîşek mezintir bibe ser TEVGERA AZADIYÊ!
Jiber ku R.Erdogan, di van rojan de, ji bo vê siyaseta xwînrij pêkbîne, ketiye nav hewldanek lezgîn; hema her roj li gel her sê dewletên dagirker û xiyaneta Barzanî di nava hevdîtinan de ye. Gumana şantajê jî heye.
Hetmen Tevgera Azadiya Kurdistanê jî li goreyî van plan û projeyan xwe amade dike.
Lê belê divê her kesên Kurdistanî û dostên Kurdistanê, li himber vê siyaset û kiryarên kurdkuj û mirovkuj bêdeng û bêhelwest nemînin!
Di hilweşandina vê siyaseta qirêj û xwînmêj de û di binkeftina vî zihniyetê malxerab de, qezenc û xêra hemû gelan û mirovahiya cîhanê heye, êdî ‘herkes û şîrê xwe’!
