Amedî Newroza 2022î de bi şîarê ‘Wext wextê serkewtişî yo’ şahîdîya rojêka tarîxîye kerde. Amed de serê sibayî têgêrayîşê seba Newroze dest pêkerd. Hem roniştoxanê Amedî hem zî roniştoxanê şaristananê bînan bi kelecanî verê xo da warê Newroze.
Polîsan şayîye de xîret kerd ke merdimî pê kincanê herêmîyan mekewê warî la şarî astengî û qedexeyî nêşinasnayî. Polîsanê tirkan bendê kontrolî de JOH, TOMA û panzerî ca kerdî û provakasyon kerd. Şarî bi sloganê ‘Biciwîyo Serek Apo’, ‘Kurdîstan do faşîzmî rê bibo goristan’, ‘Tayyîp îstîfa’ vera bendanê polîsan nêrazîbîyayîşê xo mojna.
Bendan de polîsan bi gazê îsotî û awa tazyîkîne hêrişê şarî kerd. Cinîyî bi bahaneya ‘kontrolê hîrayî’ ameyî vindarnayene. Wekîla HDPyî ya Êlihî Ayşe Acar Başaran platformî ra venga polîsan da û vat: ”Provakasyon mekê. Ma wazenê roşanî fîraz bikerê. Rayîr bidê şarî, ma wazenê şarî xo de govende bigêrê û roşanê xo fîraz bikerê.”
Şarî vera astengîyan xo ver da û hêdî hêdî war kerd de. Nêzdîyê mîlyonêk merdimî warê Newroze de ca bîyî. War de bêmabên bi sloganan azadîya Rayberê Şarê Kurdî Abdullah Ocalanî ameye waştene.
Verê sehne de mabênê polîsan û girseyê şarî de meseleyê cidîyî qewimîyayî. Netîceya hêrişê polîsan de tay kesî birîndar bîyî. 150ê ci domanê 12-17 serrî tewr tay 300 kesî ameyî destbendkerdene.
Rixmê provakasyonî zî Newroza Amedî dest pêkerd. Newroze de Kemal Kurkut û Denîze Poyraz ameyî yadkerdene. Hemserekê KCDyî Berdan Ozturkî vat: ”Na Newroze Newroza wextê azadîye ya. Na Newroze Newroza azadîya Abdullah Ocalanî ya.”
Dima ke adirê Newroze ame tavistene Dengbêj Kazo vejîya sehne ser û bi nê hawayî warê Newroze vurîya atmosferê roşanî. Servet Kocakaya, Azad Bedran û Rojda bi deyîranê xo coşê Newroze zêdîna. AMED
