Dêrsim de siba serkêşîya DEM Partî û Platformê Kede û Demokrasîyî de Meydanê Seyîd Rizayî de Newroze do bêra fîrazkerdene. Dêrsim de amadekarîyê Newroze qedîyayî. Komîteya Amadekarîye ra Îbrahîm Kasunî derheqê babete de Ajansê Mezopotamya rê qisey kerd.
Kasunî ard ziwan ke her cayê Dêrsimî ra eleqeyêko pîl est o û vat: ”Ma seba ke adirê azadîye yê Kawayî Dêrsim de tavisnê mîyanê xîretanê pîlan de yê. Xebatê ma qedîyayî. Dêrsim her hetî ra hedefê polîtîkayanê dewlete û îqtîdarî de yo. 31ê adare de weçînayîşê girîngî est ê. Ney ra ver beşdarîya Newroza Dêrsimî do biba nîşeneya serkewtişê ma yê weçînayîşan.
Ma do siba Newroze de mesajanê girîngan bidê. Ma do vera polîtîkaya tecrîdî adirê têkoşînî Dêrsim de gir bikerê. Ma venga pêro dêrsimijan danê ke siba bêrê Meydanê Seyîd Rizayî. Vera faşîzmî têkoşîno komelkî lazim o. Ma do pîya vera polîtîkayanê tirkperestî û îslamperestîye têbigêrê û meydanê Newroze têkoşînê xo xurtêr bikerê. Ma do cewabêkî bidê sîstemî.” DÊRSIM
