Newroza Îzmîrî ya emserrî do bi siloganê ‘Ma do pîya ser bikewî’ û ‘Ma do tecrîdî bişiknî’ Raşteyê Gundogdûyê Îzmirî de bêra pîrozkerdene. Hemserekê HDPyî yê Îzmîrî Kadîr Baydûrî her kesî dawetê pîrozkerdişê Newroze kerd
Seke yeno zanayene Newroza emserrî rê tena çend rojî mend. Newroza emserrî do bi siloganê ‘Ma do pîya ser bikewî’ û ‘Ma do tecrîdî bişiknî’ bêra pîrozkerdene. Bajarê Îzmirî de Newroza emserrî do 21ê Adare Raşteyê Gundogdûyî de bêra pîrozkerdene. Komîteya Amadekare ya Newroze seba pîrozkerdişî veng her kesî daye. Do Parlementera Partîya Demokratîke ya Şaran (HDP) ya Êlihî Feleknas Ûca, Parlementera HDPyî ya Îzmîrî Serpîl Kemalbay û Hemverfeka Kongreya Demokratîke ya Şaran (HDK) Gulîstan Koçyîgîte tewrê pîrozkerdişê Newroze bibî û do hunermedan ra Ayşenûr Kolîvar û Diljen Ronî zî deyranê xo vajî.
Hemserekê HDPyî yê Îzmîrî Kadîr Baydûrî seba pîrozkerdiş û tewrbîyayîşê Nwroze veng da û va: “Ma seba pîrozkerdişî muracatê Walîtîya Îzmîrî kerd. Ma destûrê pîrozkerdişî girewt. Ma do 21ê Adare de saet 16.00î ra heta 19.00î Raşteyê Gundogdûyî de bibî. Ma do hem pîrozkerdişê Newroze û hem zî mîtîngê weçînitişî pîya virazî. Newroze eynî wext de do biba mîtîngê weçînitişî. Komîsyonê rêxistinkerde, asayîş û teknîkî xebatanê xo kenî. Ma do seba pawitişî tedbîranê zêdeyan bigîrî. Kewtişê raşteyê Newroze ra heta vejîyayîş û verê platformî xeylê embazê ma do wezîfedar bibî. Komîteya amakedar do heta roja peynî xebatan û anonsan bikera. Ma do Îzmîrî ra mesajê xurt bidî Anqara.” ÎZMÎR
