Emser Newroze bi şîarê ‘Wurzê We, Wextê Azadîye û Serkewtişî yo’ do bêra fîrazkerdene. Amed de Newroze 21ê adare de. Maya Haştîye Havva Kiran û aktîvîsta TJA Dîlan Guvençe ANFyî rê qisey kerd û venga pêro kesan da ke tewrê şayîyanê Newroze bibê.
Maya Haştîye Havva Kiran Newroze sey azadîya şaran pênase kerd û vat: ”Ma sey her wextî emser zî bi coşî Newroze fîraz bikerê. Newroze xoverdayîş û ganîbîyayîşê kurdan temsîl kena. Wa Newroze biba wesîle ke berê Îmraliyî abibê. Ez venga pêro kurdan dana ke wa bêrê Newroze û yewîya kurdan bimojnê. Ma meydananê Newroze debikerê.”
Aktîvîsta TJA Dîlan Guvençe vat: ”Ala Newroze ala têkoşînê vera dîktatoran a. Eke xoverdayîş û têkoşîn est bê ruhê Newroze zî do tim est bo. Ma bi tecrîdê vera Birêz Ocalanî, polîtîkayanê şerê taybetî, şîdet, qirkerdişê cinîyan û asîmîlasyonî Newroze pêşwazî kenê. La hetê bînî ra nê prosesî de têkoşînê cinîyan ê Jin, Jiyan, Azadî, coşê weçînayîşan û têkoşînê vera tecrîdî zî qewimîyenê. Ma bi coşê 8ê Adare tewrê şayîyanê Newroze bibê û uca ra zî şorê weçînayîşanê 31ê adare. Şarê kurdî do meydananê Newroze de cewabê weçînayîşanê 31ê adare bidê.” AMED
