Kurdan 19’ê na aşme de çimê xo bi derbeyê siyasî kerdî a. Desthilatiya dagirker e ke her first de neyartîya xo ya şarê Kurdî rê ke şaro qedîm ê na erdnîgarîye yo ana ziwan 19’ê Tebaxe de rayêke bîne bi derbeyê xo yo siyasî îradeyê şarê Kurdî çinê hesebna, şaredarîyê Amed, Wan û Mêrdînî dagir kerdî û rayêke bîne Qeyûmê xo yê talankerî şaredarîyan de bi ca kerdî. Merdim wexta anêno nê mudaxileyê desthilatî ra bi raştî merdim ecêb maneno. Na dişmintîyêke senîn a ke rayedarê dewletêke bi na dişmintî pay danê îrade, heq û hiqûqanê hemwelatîyanê xo ser, demokrasî erzenê çop, qanûn, hukm û darazanê xo goreyê nehfanê xo xebetnenê û goreyê xo ra het danê ci?
Kurdan nizdê se serre vengê xo dayî partîyanê înan ê sey a, b û c yan ke hikûmat û rayedaranê ay partîyan teberê bindestî, feqîrî, mehrûmverdayîşê heq û hiqûqê merdimahî de ti çiyêke înan rê nêardêne. Dimayo ke Kurdan bi têkoşîna xo ya desan serran îmkanê awankerdişê partîya xo ya sîyasî vist destê xo tersê desthîlatî virazya û her weçînayîş de semedo ke vengan Kurdan ra bigêro xo şîrîn moşt ra û helbet dimayê weçînayîşî zî rîyê xo yo rastîn moşt ra û ancî defê xo dijverê Kurdan da piro. La wina eyseno tersê înan her ke şino zêdyeno û eyro roc risayo dereceyêke ke serokê partîyan ra bigî heta wezîran û rayedaranê înan ê qirasan açaryayê cambazan, açaryayê zombîyan û kewtê dimayê Kurdan ke înan bê îrade, bê erk verdê û bikerê muhtacê partîyanê xo yê kedwer û heqwerdan.
No ters wina tersêke yo ke semedo ke nêverdê Kurdî wayîrê îradeyê xo bimanê verê çimanê dinya de îmza erzenê binê heme awayî neheqî û bêhiqiqûyan.
Heta enka qedexekerdişê ziwanê Kurdî ra bigî heta kiştiş, koçberkerdiş û hepiskerdişan hetê na desthilatîya neyarKurd e ra bêhiqûqî ro şarê Kurdî ameyo kerdişî û înan rê mendo zî. Nê rewşî de desteserkerdişê şaredarîyêke înan rê zey qurtêke awe yo. Hela eke nîmetêke sey Qeyûmtî zî xo rê îcad kerdo yew nêeşkeno kêfê wezîr û kizîranê înan biremno(!) Hetêke zî merdim fikirêno gelo ey sirf semedo ke Pelîkananê xo yê ke çend aşmî yo veyşan mendê mird bikerê wina vecyayê seyd?
Merdimo ke tehemul bikero vatişanê rayedar, serekê partîyan, wezîr û kizîranê înan ê ke nîmetê qeyûmî ser de anê ziwan goşdarî bikero go varre na dewlete hemverê hemwelatîyanê xo û hemverê heme dinya şerm bikero. Xo ra quretiya ke mojnenê ra merdim vano qey fermandarêke bîyê û bi artêşe xo hemverê Selaheddînê Kurdî serfirazî bidest vista, bi aborîya xo Emerîka kerda girêdayey xo yan zî niştê estoranê xo û şîyê welatê Brîtanya dagir kerdo. Çi yo çi nîyo eşkayê çend şaredarîyê Kurdan ke înan bi venganê xo yê pakan bidest vistê înan dest ra vecê. La bi raştî eke Kurdî bifikrîyê nê şaredarî bi qaso ke nê wezîr û kizîrî xo rê muhîm vînenê ne muhîm ê. Nê şaredarî bi qasê ziwanê Kurdî ne muhîm ê, bi qasê taxan, dewan û şaristananê înan ne muhîm ê. Şarê Kurdî nê wextî de ke hişmendîya înan a neteweyî û asta têkoşîna înan heme wextan zêdehî rê ya bê alternatîf nîyo. Ger hetê sîyasetî ra biwazo eşkeno biancîyo sîne-î miletî zî. Tenê semedo ke heme şarandir bi awayêke demokratîk, têduşt û aştbîyaye derbas bikero, herinde şerran de aştî hikum bikero rayîrê sîyasetî weçîneno.
