Navenda Nûçeyan |
Nivîskar Haydar Işik ku ev 6 sal in tedawiya pençeşêrê didît, di 84 saliya xwe de li mala xwe ya Munîhê ya Almanyayê (17’ê Kanûnê) çû ber dilovaniya xwe.
Işık 1’ê îlona 1937’an li navçeya Nazimiyê ya Dêrsimê jidayik bûbû.
Haydar Işik dema 70 salî bû, polîsên alman bi ser mala wî de girtibûn û destê bi kelepçekirî derxistibûn dadgehê. Işik ê ku jê re ‘terorîst’ hat gotin, ji Serokê Dadgehê re gotibû ‘Dewleta we ya ku destekê didin Tirkiyeyê kurdên berxwedêr terorîze dike. Qedexeya li ser PKK’ê didomîne. Bi vî rengî dibêje Tirkiyeyê ‘hûn çi bixwazin dikarin bikin.’ Zext û qedexeyên li Tirkiyeyê yên li ser kurdan îro li vir tê domandin. Heke ez ciwan bûma ez ê ne li pêşberî we, li çiyayên Kurdistanê bûma.”
Işik li gel nexweşiya giran jî xweşbîn bû. Nûçegihan Ferda Çetîn di 30’ê kanûna 2020’an de di gotara xwe ya Yenî Ozgur Polîtîkayê de ev gotinên Işik dabû: “Ne hewceye em reşbîn bin. Li cîhanê gelek tîran hatin û çûn. Qira kurdan anîn, koçber kirin. Lê kurd dîsa xwe afirandin. Gelê me dê vê tarîtiyê ji ser xwe biavêje. Ez dixwazim diyar bikim ruhê min li cem gelê min e, di êş, kêfxweşî, serkeftin, têkoşîna wan a Rojava de, li Efrînê, Kobanê, Qadên Parastinê yên Medyayê ye.”
Federasyona Civakên Kurdistanî ya Almanya FCK BW-Bayern ji bo Işik peyama sersaxiyê da. Di peyamê de wiha hat gotin: “Li Kurdistanê bi avakirina civakeke wekhev, bi aştî, demokratîk, em ê welatê azad ku Mamoste Haydar xeyala wê dikir pêk bînin û bikin ku ruhê wî û gelek rewşenbîr û mirovên me yên fedakar şad bibe.” MUNÎH
