Ma weçînayîşêke bîn zî dimayê xo verda, la bi rastî no weçînayîş heme weçînayîşan ra vete bi. Her çiqas weçînayîşê 31ê Adara 2019ine weçînayîşêke herêmî bi zî hetê rayedaranê AKP/MHPî wa sey weçînayîşêke pêroyî û sey persgirêka bekaye û estbîyayîş û çinêbîyayîşê dewlet û welatî bi înan rê dayîş û nêdayîşê vengan wa girêdayî bo ameyne ziwan. Înan semedê girtoşê çend hebî şaredariyan nêmend bêisûlî, bêqaydeyî, vilakerdişê kîn û nefretê mîyanberê şaran heme cayan de kerd vila. La bi varnayîşê kîndarî, nefret, tehdît û her qayde astengîyanê ke hetê na desthilatîya tekparêze ra ro şaran ame kerdişî û înan ser de deya ro zî ey ê ke nê weçînayîşî de bi ser kewtî şarê Kurdî û şarê bînî yê Tirkîye ke aştîya mîyanberê şaran wazenê yê. Tehdîd û vatişê bi kîndarî ke serekkomarî domdarîya weçînayîşî de semedê şarê Kurdî û partîya înan HDPî serf kerdî heme ageyrayî ro ey û îttîfaqê ey. Şarê Kurdî rayêke bîne bi rayedaranê desthilatî, bi raya pêroyî ya Tirkîye û ya dinya da ramoştişî ke ey rayîrê azadî, aştî û demokrasî de serreyê xo danê la nênamnenê. Eke na desthilatî tecrûbeyê xo yê nê weçînayîşî ra fam bikero ke bi tehdîd, kîn û nefret ey go çiray nêarsê cayêke, go înan rê baş bo. Ancî bi nê weçînayîşî şarê Kurdî rayêke bîne moşt ra ke şarê Kurdî eşkeno Tirkîye de zî dengeyan bibedelno. Yanê ame dîtişî ke ayêko ke biwazo bi dişmintî nizdê Kurdan bibo go verepersê xo bigîro û berdêlê dişmintîya xo bido. Merdim eşkeno vaco ke no weçînayîş sey dersêke bi faşîzmî rê.
Serekkomaro ke wextê xebate weçînayîşî de teberê vengê ey ra vengê yewî nêame şinawtişî dimayê weçînayîşî zî teberê qiseykerdişê balkone vengê ey nêame şinawtişî. Qiseykerdişê ey ê balkone de zî çiyo ke min rê ecêb ame spaskerdişê şarê Kurdî rê ke semedê şaredarîyê sey Şirnex, Mûş û çend cayê bînî ke vistê xo dest(?) bi. Yew ew ca çinêbi ke ey ra vaco ti çîrê şarê Kurdî rê spas kenê, hêzanê xo yê çekdaran rê bike ke to bi hezaran antîbî Şirnex û sey qeyûman weçînoxanê xocayî yê Şirnexî ser de dabî ro. Ti zî zanê, şarê Kurdî zî zano ke welatîyanê ma yê Şirnaxican vengê xo nêdayo to heşt hezarî hêzanê to yê çekdaran ke to antîbî ew ca dayo to. Herhalde ey û îttîfaqkaranê ey nêzanayne ke go şaristanê sey Stenbolî înan dest ra şêro. Beno ke bandore şarê Kurdî ke weçînayîşan ser de eşkeno bikero zî qic vînayo. Eke ana nêbîne go herinde Şirnexî de hinî des hezarî benê vîst hezarî benê weçînayoxê anteyî biberdêne Stenbol. Yan zî mêrikî vato cayêke qic bo zî wa Kurdî vinî bikerê wa qe Stenbol dest ra şêro. Eke ana bo yeno zanayîşî ke Şirnexê ma Stenbolêke keno. Yanê Şirnex parek Stenbol o. Bi vatişêke bîn zî şaristanêke ma yo qic bi qasê şaristanê tewr pîlî yê Tirkîye bandore desthilatan ser de virazeno!
Helbet çiyoke nê weçînayîşî de şaristananê sey Çolîge ra bigî heta Semsûre, Dêrsime ra bigî heta Şirnexe de vecya raşte sere de HDP heme hêzê Kurdan zî bigîrê xo dest û semedê weçînayîşê vernîya ma de desthilatê dagirkeran ra bêrê girotişî bikoyê mîyanê xebate.
Bi hêvîya ke ma bêvengîya semedê grevê veyşanî rê zî vacê bes o waştişê înan bifînê ser destkewtişê îdareyê herêmî ro şarê ma pîroz bo.
